يقولون كاد المعلم أن يكون رسولا ........قلنالكم الكويتي أنفع

أول شي الحمدالله على سلامتكم بعد العاصفة الرملية.
وعدت بان أكتب موضوع في مقالي السابق ولكن الموضوع تغير بعد أن وصلتني رسالة عن مدرس يضرب الطلبة ويشتمهم، دخلت على الرابط ولكن لقيت ان المقطع محذوف ومادري شنو السبب، سالت صديقي وبعد فترة ارسل لي رابط ثاني شاهدت المقطع ولما حاولت افتح الرابط حق واحد من الأهل تفاجات بان المقطع محذوف، المهم وصلني اليوم رابط أخر والحمدلله قدرت أشوفه وحفظته عندي، وانا الحين اعرضه في المدونة عندي ولن أقوم بإزالته الى بعد ما أسمع بأن هؤلاء الطلبه خذوا حقهم. اترككم مع المقطع



بصراحة مادري شنو أقول أو أعلق، كلنا درسنا في المدارس ومدرسينا كانوا كويتيين ووافدين، وايامنا كان الضرب مسموح لكن بالرغم من هذا ما واجهنا مدرس مستوى أخلاقه مثل اللي شفناه، المدرسين أيامنا كانوا يطقونا ولكن كنا نحبهم لأنهم كانوا يطقونا
مثل ما يطق الأبو عياله والأبو لايمكن يأذي عياله، لكن الطق اللي شفته بالمقطع ما كان ضرب تأديبي وانما كان حقد والدليل على ذلك انه هذا الحقير كان يسب الطلبة واهلهم، اشلون .....والله ماني قادر اختار كلام يعبر عن اللي قلبي تجاه هذا ال.....اللي يدعي انه مدرس وياي ياكل من خير البلد ويسب في اهلها، وهذي مو الحالة الوحيده قبل فترة شفنا في قناة الوطن عن المدرس اللي يسب الطلبة والكويت، وغيرها من الحالات اللي ماندري عنها.

ومنا الى معالي وزير التربية الدكتورة / موضي الحمود
ليش وصل مستوى المدرسين اللي تيبونهم يدرسون عيالنا الى هذا المستوى؟ شنو المعايير التي يتم من خلالها اختيار المدرسين من الدول المجاورة؟ وبعدين ليش تيبون مدرسين من بره ؟ اشفيهم الكويتيين ؟ واذا كان الكويتيين ما عندهم التخصصات المطلوبة اشفيه المدرس الخليجي ؟ بعدين فكروا بمدرسين من بره واذا اخترتوا اختاروا صح. الحين بقول لكم شنو راح يصير بعد انتشار المقطع
- راح يحول المدرس الى التحقيق
- راح يطلق قرار بانذاره على فعلة واذا شدوا عليه خصموا 15 يوم .
- راح يتم تفتيش ابناءنا الطلبه اثناء دخولهم المدرسة واللي يلقون عنده تلفون في كامره يصادر منه عشان عيالنا ما يصورون فضايح ثانية .

مقطع الفلم تم حفظه وما راح اشيله الا لما نسمع ما يسرنا عن هذا المدرس ويجب أن يعاقب ويكون عبره لباقي المدرسين اللي بمستوى اخلاقه

هذي سالفتي اليوم ، وبانتظار تعليقاتكم.

- ملاحظة : اثناء كتابة المقال وصلني خبر بأن المحامي عبدالله التركيت تطوع لتمثيل الطلبه الطلبة وملاحقة المدرس قضائيا الذي عامل الطلبة بوحشية والمنتشرتصويرله على اليوتيوب ......جزاك الله خير باأستاذ عبدالله والله يوفقك حساب المحامي على تويتر.
 @AbdullahTurkait

2011 سنة الأحداث والتغيير

كثير من الناس والقراء يسألني عن سبب صمتي وعدم الكتابة حتى ولو بتعليق على الاحداث اللي صارت من آخر يناير والى يومنا هذا، بصراحة انا كنت منصدم من كثرة الاحداث والتغيرات اللي صارت بشكل سريع ، واول مره أشوف نفسي ماني عارف شنو أكتب ، هل أكتب عن أحداث تونس ولا اللي صار بمصر واليمن والا قاعد يصير بالبحرين وليبيا ؟ والا أكتب عن فرحتنا باحتفالات العيد الوطني ال50 وعيد التحرير ال 20 وعيد جلوس أبونا الشيخ صباح ال5 . الى هذي اللحظة وانا ماني عارف شنو أكتب .


راح أكتب باختصار وشنو يطلع ببالي راح اكتبه لكن في كلمة عجبتني سمعتها من 20 سنة يعني ببداية الغزو على العراقي على دولتنا الحبيبة والطريف بالأمر ان اللي قايل هذه الكلمة اهو الديكاتوري المقبور صدام حسين ( قالوها خذوا الحكمة من أفواه المجانين) الكلمة اهي : لايوجد حكومة بالعالم تستطيع سحق إرادة شعب


طبعا أول تطبيق لهذه الكلمة كان عليه اهو لما صارت حرب تحرير العراق واستطاع الشعب يقول كلمته ، بعدين شفتها بتونس وبدأت باليمن، وبعدين انتقلت بمصر وودي أوقف شوي عند مصر لما بدات الأحداث في مصر كلنا تفاعلنا معاها لان مصر من الدول اللي تربطنا فيها ككويتيين علاقة خاصة من جميع النواحي ومصر كانت لها مواقف مشرفة ايام الغزو ، في بداية الثورة يوم 25 يناير كنت منزعج من اللي وكنت اقول ليش المظاهرات وليش يشلون حسني مبارك وليش يعارضون الحكومة وليش وليش وليش .....بعدين قلت هذا شان داخلي في البيت المصري واذا بنقدم مساعده نتكلم لتهدئة النفوس فالشعب المصري عزيز علينا وبنفس الوقت نحترم السيد/ حسني مبارك ولايمكن ان ننسى الدور اللي قام فيه أيضا ايام الغزو ، لكن حصل اللي حصل والشعب المصري اختار والشعب المصري أدرى بمصلحته. كل اللي نتمناه أن ترجع مصر مثل ماكانت ويرجع الأمن والأمان لها. اما السيد / حسني مبارك أقول له ان الشعب الكويتي يقدم لك عظيم الشكر والتقدير لشهامتك وعروبتك في الوقوف مع الحق ومع الشعب الكويتي ضد العدوان العراقي الغاشم على الكويت، فتحركت على جميع المستويات لإدانة العدوان ومعاقبة المعتدي, وإجباره على سحب قواته الغازية من أراضي الكويت. فشكرا لك ونتمنى لك الشفاء، ولكن اسمحلي ياسيدي العزيز ماحدث في مصر هو شأن العائلة المصرية الواحدة وقرار الشعب ومصر فوق كل شيء.


اما بالنسبة لما حصل ويحصل في ليبيا فشر البلية ما يضحك الشعب الليبي قاعد يموت من ناحية ورئيسهم الله بالخير يصرح تصريحات محد يفهمها، واعتقد انه معمر القذافي هو نجم الشباك لللأحداث في هذي الفترة ، وما شاء الله الناس كفوا ووفوا.


اما البحرين فهني اقول لكم فيه خط أحمر مظاهرات البحرين ليست من الشعب البحريني وهذا رأيي لكن اعتقد انه اللي طلعوا مظاهرات اما ناس مدسوسين أو مخهم مغسول وتحركهم قوة خارجية تريد زعزعة الأمن في البحرين، وهذا الشي كلنا كخليجيين نرفضه وماراح نسمح فيه واللي يمس البحرين يمسنا البحرين جزء لا يتجزأ في جسد الخليج المكون من الكويت والسعودية والامارات وقطر وعمان عيال أهلنا في البحرين مانرضى عليهم ولا راح نتأخر اذا طلبوا فزعتنا وماراح نسمح لأي شخص يحاول يثير فتنة كلنا واحد شيعة وسنة عشنا وتربينا مع بعض ناكل مع بعض مافي شيعي ما عنده ربع واخوان سنة ومافي سني ماعنده ربع واخوان شيعة، أقول حق أخواني البحرينيين خلكم اسرة وحده ايد وحده تحت راية جلالة الملك حمد بن عيسى آل خليفة، ولاتستمعون للمفسدين مثيرين الفتن وحمدو ربكم وكلنا كخليجيين نقول الحمد لله اللي عطانا حكام ينحطون على جرح يبرى والله فرج كربتكم يارب.


والحين بغير الموضوع في اطار أحداث 2011، بتكلم عن أغلى بلد أحلى وطن الكويت احنا كانت سنة خير علينا وانا فعلا في والله لا يغير علينا عجبني شغلة قريتها يقول كل الشعوب تحترق من أجل اسقاط رئيسها ونحن نحترق لكي يظل أميرنا متألقا منيرا دمت لنا يا سيد الوطن، أعتقد هذي كافية مافي داعي احط لكم امثلة واتكلم عن مدى العلاقة بين الشعب الكويتي وصاحب السمو الأمير ومافي داعي أتكلم واعبر عن مدى حبنا لحكامنا احنا تصرفاتنا العفوية تعبر .


واسمحوا لي انهي سالفتي الحين وللحديث بقية مع مقالتي القادمة عن أحلى بلد الكويت.


الشيخ جابر الخالد قدم استقالته .......ونواب الازمات لم يقدموا استقالاتهم




كلنا سمعنا اخبار عن تقديم وزير الداخلية الشيخ جابر الخالد استقالته وحسب ما وصلني عن طريق خدمة الوطن نيوز بأن معالي الوزير قال :( تقدمت باستقالتي تحملا لمسؤولياتي وواجباتي، وتنفيذا لما قلته يوم بجلسة يوم الاربعاء "أنه لا يشرفني البقاء في وزارة تعذب المواطنين" )
مثل هذي المواقف تحدث في أرقى الدول بحيث اذا أخطأ وزير في أي دولة متحضرة يقوم بتقديم استقالته، اذكر أيام الغزو لما بدت حرب تحرير الكويت صرح أحد وزراء الدفاع في احدى دول التحالف وقال : سوف أقدم استقالتي اذا ارتفعت طائرة عراقية حربية عن الارض ؟ ، وهناك مشاكل كثيرة واختلاف بالراي يصير في دول العالم الديموقراطية ويكون الموقف مثل ما حدث لمعالي الشيخ جابر الخالد ، لكن سؤالي شنو ممكن نتعلم  هذي المواقف ؟  
ما تعلمنا  الشجاعة ؟ ما تعلمنا تحمل المسؤولية ؟ ما تعلمنا وتقول انه الرجل اذا قال كلمة أو اعطى وعد اصبحت مثل الدين بالرقبة ؟
الشيخ / جابر الخالد قال اذا ثبت الوفاة سببها احد منتسبي الداخلية راح استقيل، لكن ما قال: أقسم بالله العظيم اني راح استقيل مثلما أقسم النواب اللي كانوا بيستجوبون سمو رئيس الوزراء وقالوا انهم راح يستقيلون اذا لم ينجح الاستجواب، وينهم ؟ وينكم يانواب الامة وينكم ياللي أقسمتوا بالله العظيم ، وينكم يانواب الازمات، وفوق هذا انتم من اشعلتم هذه الازمة ، نائب يدخل المخفر في الساعات الاولى من الفجر عشان يتوسط لشخص شاذ مغتصب، وآخر يتوسط لتاجر مخدرات، والحين تبون تستجوبون الوزير عشان تاجر ومهرب خمور مات اثناء التحقيق، شنو هالتضارب، الشذوذ والمخدرات والخمور كل هذي مو حرام؟ ما ذكرها الله سبحانه وتعالى في كتابه وحرمها؟ اشلون انتوا تتوسطون حق هذي الفئة من الناس ؟ وين باقي الشعب ؟ اشلون تبونه نثق فيكم بانكم تحاربون الفساد في البلد ؟ وانتوا بطريقتكم هذي قاعدين تتصرفون وكانكم تشجعون الفساد بطريقة غير مباشرة؟
انا اقف احتراما لأحيي الشيخ / جابر الخالد على القرار اللي اتخذه بخصوص الاستقالة، واهني على شجاعته ، وبنفس الوقت اتمنى ان لا تقبل، لأنه حاليا هو لشخص المناسب في المكان المناسب ولا يوجد من هو أفضل منه لهذا المنصب.
اقول لنواب التأزيم ترا ملينا من السوالف هذي، كل يوم والثاني مشاكل وناسين البلد ذبحتونا اتمنى انكم تكونون صادقين مره في حياتكم البرلمانية وتقومون بتقديم استقالاتكم وتقدون في بيوتكم ولا ترشحون نفسكم مره ثانية تكفون مانبيكم .
هذي سالفتي والحكم لكم.

ملاحظة : اثناء كتابتي لهذا المقال وصلني خبر أنه النائب فيصل المسلم والنائب وليد الطبطبائي يحيون الشعب التونسي على موقفه على مافعلوه ، يامعودين انتوا جابلوا ديرتكم وخلكم من الدول الثانية ، يالله نشوف يوم ناس تهنئ الشعب الكويتي بسقوطكم في البرلمان  انتوا وباقي نواب الازمات.

وليد الطبطبائي .................و فيلكا


كل عام والجميع بخير ......
سالفتي اليوم عن اللي حصل يوم الثلاثاء الماضي الموفق 4 يناير 2011 في ساحة الصفاة، ماراح اتكلم عن مهازل المسرحية السخيفة وتفاصيلها، ولا راح أتكلم عن الهوسات اللي سمعتها اثناء مشاهدتي لهذي الندوة، لأننا لو رجعنا الى الأصل لوجدنا صاحب السمو هو من أمر بايقاف الندوات ولكن هذي المجموعة عصت أوامر سموه وفوق هذا قاموا بتقديم الاستجواب يعني من وجهة نظري انا ما اعترف في ناس مايسمعون كلام ولي الأمر.
لكن في شغلة صارت لما قام النائب وليد الطبطبائي وتكلم وذكر أهالي فيلكا، قبل هذه النقطة لفت نظري انه النائب وليد الطبطبائي عضو الحركة الدستورية يذكر الناس ببدعة أو يعتبرها اهو جماعته بدعة وهي تذكير الحاضرين ويقول لهم باكر 5 يناير ترا عيد ميلاد عبيد الوسمي ( عسى بس وديت له كيكة وطفيت الشمعة ) ، عبيد الوسمي اللي شتم أبناء الكويت وقال عنهم كلاب الحبيب يبي يحتفل بعيد ميلاده، وبعدين ذكر ان يوم 5 يناير محاكمة البطل فيصل المسلم وكان المسلم بطل من أبطال المقاومة، وبعدين يقول ( بانت فيلكا، ماادري اشطلع أهل فيلكا بالبيانات خنت حيلي أهل فيلكا )، أولا يانائب يافاضل مالك شغل بأهل فيلكا وأهل فيلكا مانصبوك وصي عنهم تتكلم عن معاناتهم توك الحين تقعد من النوم وتتذكرهم وبعدين تمسك البيان بيدك وتقول هذا بيان مدفوع وتبي توصل رسالة انه أهل فيلكا معاك ومع اللي واقفين يمك؟ يانائب يافاضل أهل فيلكا وحسب التاريخ لم يعتدوا على أحد ولم يتخذوا يوما موقفا ضد مصلحة الكويت وشعبها وولائهم دائما وابدا الكويت وشعبها تحت ظل حكامها آل الصياح الكرام، لذلك ياأخ وليد موقفكم وتصريحاتكم انت وجماعتك اللي تظنون انها اصلاحية ما تعجبنا، أهل فيلكا يانائبنا معروف عنهم الطيبة والهدوء واذا ماتعرف اسال عنهم ولكن بنفس الوقت عزيزين نفس اذا وصلت الأمور بالمساس ببلدهم الكويت وامنها مايسكتون فأرجوك لا تدوس لهم على طرف، أهل فيلكا مثل قلت لك ولاءهم للكويت اللي يرشها بماي يرشونه بالدم، والحمدلله احنا اهل الجزيرة مارحنا للي خانوا الكويت زحف تحت الانفاق.
النائب الفاضل وليد الطبطبائي خل أهل فيلكا بحالهم، لأن مهما يصير لايمكن تغير من ولاءهم حق الكويت، واتق شر الحليم اذا غضب ومثل ماقالولك : اذا سمعت أسم فيلكا حط ايدك على راسك


الأسد يمرض لكن ما يموت





كلنا تابعنا في اليومين الماضيين ماحدث للمواطن الاسد محمد الجويهل، كنت كاتب مقالة لكنها مسحت بسبب الطرثوث اللي اخترق الموقع وكان عنوانها اليوم قناة سكوب من التالي وكانت تتحدث بصورة عامة على الاشخاص اللذين يقومون باخذ مايسمونه حقهم بذراعهم، ما حصل للجويهل لايمكن أن نقول هذا صار بالكويت وما لا يصدقه العقل انه صار من نواب يمثلون الامة وفي بيت نائب كان في يوم من الايام رئيس مجلس الامة ويعتبر اكبر سنا من معظم الاعضاء يعني لازم يكون قدوة، كون لنفسه صورة حبوها كل الكويتيين خصوصا لما كان يدافع بكل بسالة عن حقوق الكويتيين امام رئيس البرلمان العراقي، لكن هدم كل اللي بناه وكل تعب السنين الطويلة بلحظة تحالفه بالأخ ضمير الأمة صاحب الحنجرة الذهبية نصير الطراثيث وانضم معهم بقية النواب ابطال الاستجوابات، كل هؤلاء من يدعون انهم حماة الدستور ويخافون على مصلحة الشعب والوطن اهم في الحقيقة يعملون بكل أوتوا من جهد لمصالحهم الشخصية وللمحافظة على كرسي المجلس ومحتفظين بالحصانة البرلمانية اعتقادا منهم انهم يكونون فوق القانون ويقدرون يسوون اي شي يبونه يخدم مصلحتهم، ولعلمهم الاكيد بأن أبناء الكويت الشرفاء اللي ولاءهم للكويت فقط ولا لغيرها ماطوف عليهم غزعبلاتهم اللي يسوونها فمن واجبهم المحافظة على الطراثيث مزدوجين الجنسية لان هؤلاء الطراثيث هم من يصوتون مقابل المادة وماله شغل بالوطن وبالكويت تدرون ليش لان لما تروح الكويت يطلع جنسيته الثانية مثل ما صار سنة 90 لما صار الغزو كل الطراثيث قطو جناسيهم بالزبالة وطلعوا جناسيهم الثانية وكل من راح حق ديرته ولما سمعوا انه سفارات الكويت تصرف معاشات حق الكويتيين أيام الغزو هم راحوا وخذوا المعاشات لا وفي ناس سجلوا نفسهم بأكثر من دولة تبون أكثر من جذي نفس دنية أزيدكم من الشعر بيت لما أمير القلوب رحمة الله عليه أمر بصرف 500 دينار للكويتيين الموجودين بالداخل بعد التحرير دخلوا وكل رب أسرة دخل الديرة ومعاه البطايق المدنية حق اهله وادعى انه كان موجود داخل الكويت أثناء الغزو، ادري انه أغلبكم يدرون بهذا بس انا ذكرته من باب التذكير، الحين صارلنا 20 سنة من الغزو واحنا نعاني من الطراثيث ولكن في البداية ماكنا حاسين فيهم وهم يدخلون بيننا مثل المرض اللي ينتشر بالجسم مانحس فيه الا بعد ما يتمكن وهذا اللي صار تمكنوا ولقوا اصوات وناس تدافع عنهم وهذ اللي قوا شوكتهم، فحبوا يتمادون أكثر ويفرضون شريعتهم وقوانينهم علينا وهي شريعة الغابة وقانونها سهل وبسيط وهو يا انك تكون معاي وتوافقني رايي وتساعدني في اللي اسويه مهما كان صح أو غلط ياما اشيلك من طريجي حتى لوكان هذا يكلفك حياتك، وهذا اللي صار مع الجويهل مايعرفون يناقشون ولا عندهم خبره في فنون الحوار قاموا واعتدوا عليه بالضرب بنية قتله والدليل انهم كانوا يبون يقتلونه ما سمعناه من التصوير يوم الحادثة.


انا اقول الجويهل غلطان نعم غلطان لأن لبى الدعوة لحضور الندوة وظن انه بروح حق ناس لازالوا كما يدعون انهم متمسكين بعادات الكويت واهلها بل عادات العرب جميعا واللي هي بكل بساطه تقول طالما الرجل ضيف عندي وفي بيتي فهو في حمايتي حتى لوكان غلطان في حقي وظنونك يابودعيج ماهي بمحلها للأسف، انت رحت وحضرت لكنهم مبيتين النية لك ولا من وين طلعت العصي والصاعق انا اللي اعرفه انه الواحد لما يروح ندوة ياخذ معاه ورقة وقلم علشان يسجل ملاحظات آلة تسجيل عشان التطور لكن ياخذ معاه عجره او صاعق كهربائي أول مره اسمع فيها، وفوق هذا كله وهو ما استنكره جميع الناس من مؤيدين ومعارضين للجويهل انه بعد ماتم الاعتداء عليه بدل ماتوقف الندوة يا السعدون ياصاحب الديوانية وتقوم وتسوي أقل مايمكنك فعله وتاخذ الريال أو حتى تطل عليه أو تركب معاه سيارة الاسعاف لو توصل معاه الى باب الطوارئ ، تقوم تكمل ندوتك مع حلفاءك بكل دم بارد، صدق لمن قال السيد/طلال السعيد في قناة سكوب لو الغيت الندوة ورحت مع الجويهل كان في ناس حبتك وكرهت الجويهل لكنك تصرفت وكانك شريك بهذا الفعل انت ومن معك من أعضاء مجلس الأمة اشلون تبون الشعب يأتمنكم على نفسه اشلون تبونه نثق فيكم والا صج نسيت احنا مانهمكم انتوا يهمونكم الطراثيث اللي قاموا بالواجب مع الريال، ممكن تقولون يا نواب يا محترمين اللي كنتوا موجودين بالندوة اشبينكم وبين الجويهل؟ ليش هذا العداء معاه؟ أهو تكلم عن مزدوجي الجنسية وهذي ماده في الدستور الكويتي اللي قاعدين تدافعون عنه ليش معارضين هالمادة؟ هل في بينكم يانواب من يحمل جنسية غير الجنسية الكويتية؟ علمونا، شنو سوالكم الجويهل سبكم ؟ القضاء موجود واللي له حق بياخذه، غلط عليكم ؟ انتوا ماقصرتوا فيه في تجمعاتكم وماخليتوا كلمة الا وقلتوها عليه، لكن اهو لجأ للقضاء لأن يؤمن بأن احنا نعيش في دولة يحكمها القانون.

والحين يا اخون اللي صار حق محمد الجويهل ممكن يصير لأي شخص يعارضهم هل راح نوقف ونشاهد؟ ولما يلجأ الجويهل الى القضاء هل راح ننتظر ان يجتمع المجلس ليصوت على رفع الحصانة عنهم؟ اهم الندوة اللي سووها وقالوا الدستور وحماية الدستور وكل هذه البهرجة علشان الحكومة طلبت رفع الحصانة عن فيصل المسلم عاد هذا سالفته سالفه ياخي انت واثق من نفسك ارفع الحصانة وواجه مو تروح لي قناة الجزيرة تتشكى بس زين يسوون فيك اللي دقوا وبالذات المصري اللي مارديت عليه ولا سكته المذيعه ردت عليه وانت لا انا مالي خلق اتلكم عن سالفة المسلم، لكن أتمنى انه موضوع الاعتداء على محمد الجويهل مايعدي على خير ولازم الجاني ياخذ اقصى العقوبات حتى يكون عبرة لكل من يحاول أن يفرض شريعة الغابة ويغتصب الديموقراطية ويكمم الأفواه واذكركم احنا بالكويت بلد الحريات ديننا الاسلام دين السماحة وتحت راية حكامنه الصباح الله يعزهم اهم اللي اعطونا حرية التعبير عن الراي فيجب ان نحترم هذه الحرية ونستخدمها في مصلحة بلدنا .


هذه سالفتي اليوم وما أقول الا حفظ الله الكويت وشعبها من كل مكروه في ظل والدنا صاحب السمو الشيخ صباح الأحمد الصباح وولي عهده الأمين سمو الشيخ نواف الاحمد الصباح والحكومة الرشيده بقيادة سمو الشيخ ناصر المحمد الصباح
وكل عام هجري وانتم بخير ......

أرحلـــــــــــــــــــوا جميـــــــــــــــــــــــعا
 






مدونة الفيلكاوي

السلام عليكم



عيدكم مبارك وعساكم من عوادة وعسى ان شاء الله العام القادم نكون جميعا مجتمعين في عرفات قولوا آمين.


الحمدلله اني قدرت استرد مدونتي بعد ما تم اختراقها ومسح جميع المقالات اللي كتبتها، والحمدلله انه معاي نسخ احتياطية لجميع المقالات اللي تم مسحها، الصراحة فكرت وايد شنو أكتب رد على هذا الفعل، لكن قلت قبل لا أكتب اي كلمة ضروري اراجع مقالاتي يمكن على الرغم من اني متأكد اني ماغلطت، وحسب تربيتي واخلاقي ما سبيت أو غلطت على أحد، وفعلا مالقيت شي، وبامكانكم تقرون المقالات كلها وتراجعونها انا قعدت اتساءل ليش صار حق المدونة اللي صار قمت ادور وين الغلط اللي سويته؟ دورت مالقيت


حسب مايدعي الطرثوث اللي سوى الشغلة الصبيانية هذي انه مسح المقالاات احتجاجا على احدى المقالات عن السيد / محمد الجويهل، أولا انا ما اعرف الجويهل وعمري ما التقيت ولا اهو يعرفني وحتى يوم كان مرشح نفسه ما حضرت له اي محاضرة أو ندوة، لكن كل اللي سمعتنا من هذا الرجل انا مقتنع فيه يقول كلام منطقي، بعض الاخوان وصلتني منهم رسايل على الموبايل قالوا لي زين يسوون فيك، لأنك ماتعرف حقيقة الجويهل، هذا حرامي وهذا ينصب على الناس و....و...و...و..كلام كثير، انزين اهو قاعد يهاجم مزدوجي الجنسية وهذا شي كل الكويتيين موافقين عليه ومااعتقد انه الكويتيين يعارضون احدى مواد الدستور التي تمنع أن يكون المواطن يحمل جنسية أخرى الى جانب الكويتية، ونتيجة مهاجمته لهؤلاء تعرضوا له بعض أعضاء مجلس الأمة المنتفعين من وراء هؤلاء المزدوجين، الرجل تكلم عن شخص لا يحترم الكويت بابسط الامور وهو الوقوف عند النشيد الوطني بعد ما الكويت رزته وصار عضو في برلمانها وأقسم على احترام دستورها في أحد يقدر ينكر هذا؟ ايضا هاجم من تلاعب بمشاعر المواطنين ووعدهم بان يسقط القروض عنهم واقسم لهم وهو من وراهم مسويله الصاله اللي حاطها ويستنفع من وراها يكون بيصير نفس بودي، ولا شيخان الفارسي ، أو الميلم هؤلاء اللي بنوا الصالات ويقدمونها للمواطنين بالمجان مومثل ماشفنا في السراية الاخيرة 400 دينار اجار الصالة.
اما الشخص الثالث اللي طلع وهو يهاجم ويقول باعلى صوته تسقط الحكومة ويسقط رئيسها هذا طبعا مادري شلون دخل معاهم يمكن حب يسويله حركة أو دور ، اما هذا اللي مسمي نفسه ضمير الامه صاحب الحنجره الذهبية واللي ماخلى أحد ما تهاوش معاه وماخلى أحد الا وسبّه واذا أحد كلمه رفع عليه قضية .
الحين هذيله الناس اللي هاجمهم الجويهل وعنده الوثائق اللي تثبت صحة كلامه، اما اللي هاجموا الجويهل وادعوا عليه ما ادعوا شنو دليلهم على صحة كلامهم ماشفنا شي، اذن انا في هالحالة منوا اصدق ؟

انا يمكن قلت من قبل انا مع الجويهل في القضية اللي طرحها وراح ادعم رايه لانه نفس رايي وان يجب وضع حد لهذه الظاهرة دخول اشخاص لا يحملون اي معنى من معاني الولاء للوطن وهدفهم استنزاف خيرات البلد وبالتالي الذهاب والبحث على دولة ثانية لاستنزافها، وهناك أشخاص رايتهم بعيني وسمتعهم آذاني في احدى العزايم ياكلون من الكويت ويدعون بطول العمر للبلد المجاور.

هذا موقفي من السيد / محمد الجويهل، وهذا رأيي في مزدوجي الجنسية ، لكن هذا مايعطيك الحق ياللي دشيت الموقع تمسح كل اللي فيه الا اذا الكلام اللي كان مكتوب عوّرك وحسس على البطحة اللي على راسك لدرجة انك فقدت عقلك المغسول بافكار معتقدات خلتك ما تمسك نفسك وتهكر على المدونة وتمسح محتوياته وتظن بفعلتك انك قضيت على واني ماراح ارجع واتكلم، انت ياللي تدعي باني أحمل فكر مسموم فاذا كان حبي وعشقي للكويت صار فكر فكر مسموم فياحلاة هذا السم واتشرف بان يكون جسدي مسموما بحب الكويت، انت ماقمت بفعلتك هذي الا لأن الموضوع يمسك يعني أنت أحد مزدوجي الجنسية يعني انت ممن تأكلون من خير الكويت وتشكر غيرها، انت ممن تنكر للكويت يوم 2/8/1990م ورميت الجنسية في سلة المهملات وركضت الى بلدك الاصلي تقدم له الولاء والطاعة ولما رجعت الكويت لأهلها رجعت علشان تكمل نهب واستنزاف لخيرها، الحين منوا اللي عنده فكر مسموم انا ولا انت؟ رسائل التهديد اللي وصلتني عن طريق البريد الكتروني تأكد أنها ماهزت شعره فيني لانك جبان تخاف المواجهة، لكن انا حركتك هذي زادتي قوة لاني مؤمن بالمقولة الضربة التي لاتقتلك تزيدك قوة.

هذي سالفتي اليوم واتمنى اتكلم معاكم بالفة افضل في المرة الياية .