وتاليها معاكم؟، من شهر ديسمبر صارت الانتخابات والنواب انقسموا البعض اصبح حكومي والبعض معارض للحكومة وطلعوا لنا ناس معارضين للحكومة والمجلس وبالذات للرئيسين رئيس مجلس الوزراء ورئيس مجلس الأمة، وتابعنا الاحداث والاكشن اللي صار من د. بدر الداهوم واسقاط عضويته واشغلونا كمواطنين يرجع ولا ما يرجع وتم تعطيل الجلسات ومقاطعتها وهذا بيضيق عليه الوسيعة وهذاك يقول احكام قضائية وتم الاعلان عن خلو المقعد واعلان موعد انتخابات تكميلية وفتح باب الترشح.
سؤال انا كمواطن شنو استفدت؟
وبعد الاعلان ان الانتخابات التكميلية وفتح باب الترشيح بدت الناس تسأل من البديل، ويصير الاكشن الثاني ويعلن د.عبيد الوسمي ترشيح نفسه مكان د. بدر الداهوم ليدخل بديلا حتى يرجع وحمل راية تضييق الوسيعة خلفا للدكتور بدر، وناس بدت تحلل وناس تقول انه راح يكون في حل للمجلس وخلال هذي الفترة كنت اشوف بعض النواب يقاطعون الجلسات وبعض المرات يحضرون عشان يمنعون انعقاد الجلسات وطبعًا تم تعطيل الكثير من اقرار القوانين
سؤال انا كمواطن شنو استفدت؟
نجح د. عبيد في الانتخابات التكميلية بفوز كاسح وحقق رقم قياسي من عدد الاصوات واعتقد راح يسجل في موسوعة جينيس للارقام القياسية، في ناس كانت متفائلة وفي ناس كانت تترقب الاحداث مثلي، واستمر النواب المعارضين بمقاطعة الجلسات وقاموا يحضرون ويجلسون بمقاعد الحكومة وأعضاء الحكومة يزعلون ما يحضرون لأن النواب المعارضين قاعدين أماكنهم اللهم الجلسة اللي د.عبيد ادى القسم فيها وبعدها تكررت الأحداث وتعطيل الجلسات.
سؤال انا كمواطن شنو استفدت؟
انا من وجهة نظري قاعدين نشوف مسرحية والمسرحيات كثرت في الآونة الاخيرة النوب يدعون انهم معارضين لكن مقاعد اشوف معارضة، انا عشت أيام مجلس 85 اللي وقرأت عن المجالس اللي قبلها، فعلا كان هناك معارضة حقيقية معارضه تخاف على البلد تخاف على مصالح الشعب معارضة للحكومة في القرارات الخاطئة ومتعاونه معاها في القرارات الصح، والغزو كان خير شاهد لما التفت المعارضة حول الحكومة والقيادة السياسية وكانت الكويت فوق كل شي.
هذي المعارضة الصح بغض النظر عن أفكارهم ، لكن في السنين الاخيرة شفنا معارضه تهيج الشعب للنزول الى الشارع وتخريب واقتحام المجلس بل تعدت في خطاباتها على الذات الأميرية ونصهم الان مهجرين بسبب أحكام، نواب استغلوا اداة الاستجواب صرنا نشوف استجوابات مالها أول من تالي وصار النائب اللي يصارخ اهو القوي، النواب المعارضين أو ما يسمى بالمعارضة لأني لا أعتبرهم معارضين سوالف مش معاملتي والا استجوبك هؤلاء ليسوا بمعارضين، طبعا انا انتقادي هذا مو معناه أني أعفي الحكومة من النقد ولا أعفي النواب البصامين اللي اي قانون تطرحه الحكومة موافقين عليه راح أخصص لهم مقالة بالمستقبل، بس هني بتكلم عن النواب المعارضين اللي يدعون انهم معارضين خايفين على مصالح الشعب والمواطن اللي وصلهم الى المجلس واللي لولا هذا الشعب ما تشوفون باب مجلس الأمة وكل هذا نتيجة ووعود تعهدوا فيها امام الناخبين من أجل الحصول على أصواتهم.
والحين لما صارت هذي المسرحيات بايخة وبدت اعداد المشاهدين يقل حبوا يسسون بعض التغيير الفاشل لزيادة الاكشن فضافوا بعد الحركات الكوميدية بدخول نائب قاعة البرلمان وبيده ميكروفون وكأن بسوق الحراج، ونائب ذكرني بالفنان علي المفيدي الله يرحمه في مسرحية حامي الديار يتمشى عشان يقاطع زملاءه سواء من أعضاء الحكومه أو النواب الموالين للحكومة.
الى لحظة كتابتي لهذا المقال اليوم جلسة إقرار الميزانية طبعا الاكشن كان غير هوشه وطق صراحة صرنا علج بحلوج الناس عقب ما كنت ديموقراطيتنا مثال لكل الدول اللي حوالينا
واكرر سؤال انا كمواطن شنو استفدت؟
وتاليها معاكم شنو انجازاتكم غير تعطيل مصالح البلد، الشعب تعطلت مصالحها وانتوا تتهاوشون على عضوية نائب الشعب قاعد يعاني وانتوا تتهاوشون على رئيس المجلس الامة هذا نبيه وهذا ما نبيه انتوا تسمون نفسكم معارضة اذا ما قدرتوا تسوون الشي تتهاوشون وتكافخون داخل المجلس شنو خليتوا حق اليهال ؟ انتوا معارضة؟ انتوا ماقدروا تتفقون في التصويت على رئاسة المجلس وانقسمتوا بينكم وبين أنفسكم تبون أصدقكم انكم خايفين على مصالحنا كمواطنين ؟ عيب اللي تسوونه في حق الكويت والله عيب، مادري شقول ؟ شنو اعدد الانجازات اللي وعدتونا فيها وماصار اي شي شعاراتكم ووعودكم واهتمامكم بمصلحة المواطن ما نشوفها الا مرة كل أربع سنين بس عشان الصوت وبعدها خاموش، مانبي الرئيس انا ما اتفق مع رئيس مجلس الأمة مرزوق الغانم في كثير من الامور بس الريال نجح وصل لكرسي الرئاسة بتصويت أول جلسة لأنكم فشلتوا ما قدرتوا تخسرونه بتخربون الجلسات بينكم وبينه مشكلة شخصية احنا شكو كشعب تتعطل مصالحنا، تعايشوا مع الموقف وحطوا مصلحة البلد جداكم خلوا روحكم رياضية، بس خلاص قعدوا واقروا قوانين تصب في مصلحة البلد والمواطنين، تعطيلكم للجلسات ما صلح شوارعنا، ولا عدل البنية التحتية لبعض المناطق ولا عدل مستوى بعض المناطق والمدن مثل مدينة صباح الأحمد اللي تندفن بمجرد هبة هوا مع شوية غبار وسكانها يعانون من هذه المشكلة من زمان، فكرتوا في القروض اللي مشلخه 90% من الشعب، قدرتوا تردون اموال الشعب اللي انباقت في التأمينات الاجتماعية؟ وغيرها من الاختلاسات؟ شنو انجازاتكم ؟ ترا بس ذبحتونا عيب اللي قاعد يصير اتقوا الله في الكويت واتقوا الله فينا.
الكلام ما يخلص وهذا شوية من كلام كثير بقلب مواطن كويتي يشوف أحلامه تتدمر جدام عينه مواطن كويتي عاش ايام العز لما كنا درة الخليج عروس الخليج أسياد الخليج في كل المجالات السياسية والاقتصادية والرياضية وكل شي كنا قدوة للي حوالينا من الدول اللي الان تفوقت علينا وصلنا للقمة وهذا شي سهل لكن ما حافظنا على مكانا في هذي القمة وهذا الشي الصعب.
وآخر كلامي أقول ياوطن لك من يحبك
