الجنسية لزوج الكويتية الأجنبي



السلام عليكم

      شدني خبر بان هناك دراسة حكومية تمنح الأجنبي والبدون المتزوج من كويتية حق الحصول على الجنسية الكويتية وهذا من باب استكمالا لحقوق المرأة الكويتية ومساواتها بالرجل.
     
      انا اللي اعرفه من يوم ماكنت صغر واللي شفته من أهلنا اللي تزوجوا، انه الريال لما يتزوج يروح ياخذ زوجته من بيت أهلها الى بيته أو بيت أبوه، يعني انه الريال وهذه من أبسط حقوق الزوجه انه الزوج لازم يوفر لزوجته المسكن والملبس والمصروف وغيرها من الحقوق بس انا ذكرت ابسط الحقوق، يعني لما المواطنة الكويتية توافق انها تتزوج غير كويتي لازم تتبع زوجها وين مايكون وعيالهم يتبعون أبوهم، يعني تروح معاه الى ديرته وتعيش معاه هناك ولازم يعطيها كل حقوقها، بس اللي قاعد يحصل الحين مابي أقول الكل وانما الأغلبية بناتنا كويتيات يتزوجون من غير كويتي وهذا لقاها فرصة يتزوج كويتية ويعيش عاله عليها لا ويمكن يكون متزوج بديرته ويخليها تصرف عليه بالكويت وعلى زوجته وعياله بديرته.

      والحين بعد بتعطونه الجنسية الكويتية جذي خربت السالفة بعد ماياخذ الجنسية ويكون له حقوق المواطن الكويتي، ييب عياله من ديرته أو ممكن اذا تزوج وحده من ديرته وياب منها عيال ييبهم الكويت وياخذون الجنسية بعد أبوهم كويتي ونعتفس زود، بروحنا مومفتكين من المزدوجين وتونا بدينا نكشفهم هالمره بتعمونها بهذا القرار أتمنى أنه مايوافقون عليه يبا المواطنة الكويتية محد طقها على ايدها وقال لها تزوجي غير كويتي ودام انها وافقت خل تلحق زوجها.

      كثير من الحالات مرت علي وعلشان أكون صادق في ناس تزوجوا من كويتيات وكان شرطه الأول انها تعيش معاه في بلده ولايسمح لنفسه انه يكون عاله عليها هؤلاء والنعم فيهم لكن في ناس نفسهم الله بالخير يحب يعيش عيشة الطفيليين، ياجماعة قلناها أكثر من مره الجنسية الكويتية عزيزة مو أي واحد ينال شرف حملها، بتقولون عني مغرور نعم أنا مغرور في حبي لوطني بتقولون علي شايف نفسه نعم انا شايف نفسي لأني كويتي. وهذا شعور أي موطن تجاه بلده.

      هذي سالفتي واتمنى ما أكون أزعجتكم فيها.