ليه متى ؟

سالفتي اليوم ماكان ودي أكتب عنها.....بس

المهم أنا نولدت في منطقة الرميثية وعشت فيها، درست بروضة النيل مع باجي عيال المنطقة وبعدين الشهداء وخلال الفترة هذي كنت اشوف بعض ربعي يغيبون يوم عاشوراء سالتهم ليش تغيبون قالولي لان نروح الحسينية، قلت حق ابوي اشمعنا ربعي يغيبون وانا لا؟ حتى انا ابي اغيب، ما قال لي شي وسمح لي حالي حال ربعي ما قال لي لا!! هذيلة شيعة واحنا سنة، ما كان في فرق وماكنا نحس بفرق وربعي نفس الطريقة، مجموعة أصدقاء على قلب واحد عمرنا ما انتبهنا انه في بيننا شيعي وسني كنا ربع بمعنى الكلمة كانت المساجد في المنطقة في نظرنا مساجد بيوت الله وكنا ندخل ونصلي فيها مافكرنا اذا كنا دخلنا مسجد للشيعة أو مسجد للسنة حتى الكبار من أهل المنطقة لما يشفونه نصلي ما يقولون لنا شي، هذا اللي تربينا عليه أنا وربعي  واحنا مثال حق ربع وايد غيرنا تربوا على نفس الطريقة ما كان في بينا هذه الحساسية اللي قاعدين نشوفها هالأيام انت شيعي وانت سني وانت حضري وانت بدوي وانت وانت والله لو كان بينا واحد يهودي ماحسينا فيه لان احنا كنا نرافج الشخص لأخلاقه مو أصله ومذهبه، ليش تغير الحال وخصوصا الأيام الأخيرة هذي، كل يوم والثاني نسمع خبر انه مره كاتبين على طوفة مدرسة يسبون الصحابة، ومره باحد المساجد، وفي ناس مكسرين مسجد شيعة وغيرهم مسجد سنه، ليش جذي ؟ ومن وين يتنا هالأشياء الغريبة ؟ بصراحة انا متأكد مليون بالمية هذي مو أفعال أهل الكويت هذي أفعال ناس يحملون فكر شيطاني مو كويتيين، اهل الكويت سنه وشيعة كانوا عايشيين مع بعض من تأسست الكويت يقومون ويقعدون مع بعض ياكلون مع بعض حاربوا مع بعض ما يصير في يوم وليله يقلبون على بعض، ما أنسى وقفة السنه في الرميثية مع النائب السابق عباس الخضاري ونجح بالانتخابات، ولا أنسى وقفة الشيعة اللي رجحوا كفة النائب جمال أحمد جمال ونجح بالانتخابات، هذيلة شيعة وسنة الكويتين، كم سني خواله شيعة ؟ وكم شيعي خواله سنه ؟ عمر المذهب ما يخلينا نجرح بعض مذاهبنا الشيعية والسنية كانت تجبرنا نحترم بعض، ليه صرخ السني وقال الآه تلقى ألف شيعي يسندونه ، وليه نادى الشيعي لقى ألف سني حواليه.
صدقوني اللي قاعد يصير هالأيام أفعال ناس نجسه تبي تفرق بين الشعب الكويتي، لا تخلونهم ولاتعطونهم فرصة يأثرون علينا ولا على عيالنا، مسكوا عيالكم علموهم قولولهم اشلون كنا عايشين مع بعض واشلون اهلنا واجدادنا كانوا عايشين مع بعض، قولوهم انه يوم عاشوراء الشيعة يستذكرون حادثة مقتل الحسين حفيد اشرف الخلق سيدنا محمد عليه الصلاة والسلام رسول وامام المسلمين جميعا سنه وشيعة، والسنه في يوم عاشوراء يصومون بس كلنا نجتمع بهاليوم على أحلى صينية مجبوس لحم واحلى شربت فيمتو على طاري الأكل في الحسينيات في واحد من اخواني الشيعة يقول لي هناك بعض السنه يتبرعون بالذبايح لبعض الحسينيات، اذا كنا أحنا الكويتين العلاقة بين الشيعة والسنة وصلت الى هذا الحد، هل تعتقدون أو حتى تفكرون انه الكويتين يسوون بعض جذي يسبون بعض ويجرحون بعض.
هذي سالفتي واتمنى من كل أخواني الشيعة والسنه انهم يتماسكون أكثر، وانا من اليوم ورايح اذا احد سالني عن مذهبي جوابي له راح يكون انا مسلم كويتي وافتخر، واللي يجيب طاري الشيعة بالشينة أقص لسانه، لأني واثق انه عندي أخو شيعي راح يقص لسان اي شخص يجيب طاري السنه بالشينة.

النواب والزيادة والمال العام


من 2300 دينار الى 5750 دينار زيادة رواتب أعضاء مجلس الأمة، يستاهلون ليش لا ، اهم اقعدوا خمسين جلسة عشان يعارضون زيادة الخمسين دينار للمواطن، وبعضهم اعترض بقوة على المكرمة الأميرية 1000 لكل كويتي ، وصرحوا وقالوا لا تدلعون المواطن وتلعبون بالمال العام بدنا نعمر البلاد مابصير هيك تعطون المواطن الكوايتي 1000 دينار، كان من الأفضل نتبرع لبيروت، وغيرها من القرارات اللي تحدد مصير المواطن الكويتي من اسقاط القروض وزيادات 50 دينار و 120 دينار كانوا عشان  يقرونها يشيلون ويشدخون بالجلسات سؤالي لنواب التأزيم المحافظين والمدافعين عن المال العام ليش ما سمعنا أصواتكم بمعارضة قرار الزيادة ؟
5750 - 2300 = 3450 دينار زيادة على رواتبكم واحنا 50 دينار بالحسرة علينا لا واللي معاشه 1000 وفوق ما يستحق الخمسين.
سمعني رايك يا أحمد السعدون

وين حنجرتك الذهبية يا ضمير الأمة مسلم البراك
وشو رايك يا رولا محرزة ولا مو محرزة


 النائب الفدائي نصير الكضية وليد الطبطبائي حلوة الزيادة تشتري يخت وتروح فلسطين

النائب فيصل المسلم انت بمصادرك راح يوصلك صورة عن كشف حسابات الاعضاء في البنوك عشان تأكد لهم انه الزيادة نزلت بحساباتهم كل شهر
وباجي الاعضاء ماسمعنا أصواتكم يمكن الفرحة ربطت لسانكم
اللهم بعض النواب واللي احيهم على موقفهم منهم النائب مبارك الوعلان .



والنائب الحبيب عاد هذا عمري ما شفته وقف ضد المواطن
النائب علي الراشد

من الرسائل الطريفة اللي وصلتني حسب لرواتب الاعضاء بعد الزيادة :
5750 * 50 عضو = 287500  مائتان وسبعة وثمانون ألف و خمسمائة  دينار شهريا 
 287500 * 12 شهر = 3450000 ثلاث ملاييين واربعمائة وخمسون الف دينار سنويا
ضرب 4 سنوات مدة المجلس = 13800000 ثلاثة عشر مليون وثمان مئة ألف انا قريته جذي اذا غلط صلحوا لي لأني اكبر عدد اعرفه المليون لاني تعلمته بالمدرسة، كانت هذي الحسبة لجميع الأعضاء اما الحسبة الثانية فهي للعضو بروحه
5750 * 12 = 69000 دينار سنويا
ضرب 4 مدة المجلس = 276000 دينار
العضو ياخذ كل هذا مقابل شنو:
حضور 4 جلسات في الشهر طبعا شيلوا الاجازة ، ولاتنسون هذا غير المميزات والسفرات.
ماعندي كلام أكثر من جذي أقوله غير حسبي الله ونعم الوكيل