سووها اذا كنتوا صاجين


سالفتي اليوم عن نواب التأزيم، في يوم الأثنين 21/11/2011 وفي ساحة الإرادة كان تجمعهم المشؤووم واخذوا كالعادة يصارخون وبكل قوة عين يطالبون باستقالة سمو رئيس مجلس الوزراء، ويدعون ان هذه من مطالب الشعب الكويتي وأعتقد ان تجمع يوم أمس كان أكبر رد عليهم .
ومن خلال ندوتهم التعيسة قال بعض النواب وبالضبط النائب جمعان الحربش : (ليصعد رئيس الوزراء المنصة في 29 الجاري، فإن حاز على الثقة من النواب استقالت المعارضة من البرلمان) 
تكفون كم مرة يا معارضة هددتوا بالستقالة في حال حصول الشيخ ناصر على الثقة، وما سويتوها، كونوا عند كلمتكم هذي المره واستقيلوا، ولو اني ما اعتقد انكم راح تستقيلون راح تتمسكون بكراسيكم لأنكم دخلتوا البرلمان على اكتاف الشعب الكويتي اللي صوت لكم بعد ما اوهمتوا انكم ستنجدون نفسكم لخدمتهم وانتوا فقط تبون توصولون الى الكرسي لتحقيق مصالحكم الشخصية حتى وان كانت على حساب مصلحة الوطن، سألتكم سؤال من قبل والحين اسألكم مره ثانية وين بتوصلون الكويت بتصرفاتكم الهمجية ؟ شنو الصورة اللي تبون العالم يشوفنا فيها ؟ انتوا امس قلتوا جدام من يتبعكم انكم راح تستيقيلون اذا حاز سمو رئيس الوزراء على ثقة، وانا اقول لكم من الحين راح يحصل عليها، وهو ليس بحاجة الى ثقتكم تعطونه اياها، لأنه حاز على ثقة أكبر واحد بالبلد وهو صاحب السمو أمير البلاد، وهذا يعني انه حاز على ثقة الشعب الكويتي كله لأننا كلنا نتبع ولي أمرنا، لكن كونوا عند كلمتكم واستيقيلوا اذا انتوا صاجين على الأقل ما تطيحون من عين اللي اردحوا لكم يوم الأثنين .
هذي سالفتي واتمنى من كل قلبي ان ينفذ نواب التأزيم وعدهم ويستقيلون ويفكونا .

ملاحظة : النائب وليد الطبطبائي يقول انه من حضر تجمع البيعة لسمو أمير البلاد مدفوع له 20 دينار، عيب عليك يانائب يافاضل ترا الكويت صغيرة وكل اهلها تربطوهم صلة قرابة وقد يكون أحد أقربائك موجود، وللمرة الألف نقول لك اذا طريت أصغر مواطن كويتي حط ايدك على راسك، وكل من يرا الناس بعين طبعه اذا احنا مدفوع لنا 20 دينار عشان نحضر، انت كم مدفوع لك لما رحت سفينة التايتنك وصادوك الاسرائيليين ؟

بؤرة الفساد


سالفتي اليوم عن مفهوم الفساد هذي الكلمة صرنا نسمعها باليوم اكثر من شرب الماي نسمع اعضاء مجلس الأمة اللي ينادون بالقضاء على الفساد المتفشي بالبلد وانه يجب القضاء عليه والقضاء على بؤرة الفساد، ودايما يتهمون الحكومة أو الحكومات التي ترأسها سمو الشيخ ناصر المحمد الصباح بالحكومة الفاسدة ويحملون سموه المسؤولية الكاملة الى أن وصلت فيهم الجرأة بتوجيه الاتهام مباشره الى الشيخ ناصر وأنه بؤرة الفساد وان في عهده انتشرت الرشوة، والسرقات واتهموه في ذمته المالية و..و..الخ.

لذلك قاموا يطالبونه بالرحيل عن المنصب متناسين أن من يعين رئيس الوزراء هو صاحب السمو أمير البلاد ، ومع هذا ما اسكتوا حاولوا عن طريق الأستجوابات، ما لقوا فايدة قاموا يهيجون الشارع الكويتي وللأسف لقوا بعض العقليات الصغيرة اللي تصدقهم وطلعوا للشارع والى ساحة الإرادة ويسوون الندوات وصراخ من الحنجرة الذهبية ضمير الامه وردح من الثاني وتحذف العقل وشق ثياب كل هذا لأنهم مايبون الشيخ ناصر، ولأننا في بلد ديموقراطي فقط أعطيت لهم حرية التعبير عن الرأي، لكن الحبايب فاهمين غلط وأولهم اعضاء مجلس الأمة اللي كانوا معاهم اللي يظنون انه الحصانه البرلمانية تخليهم يتعرضون للأشخاص ويسبونهم ويتكلمون عن أعراضهم من غير ما يوقفهم أحد، وان حرية التعبير عن الراي تعطيهم الحق بان يوجهو الاتهامات للآخرين سواء كان هناك دليل أو لم يكن.

النائب مسلم البراك والنائب فيصل المسلم والنائب جمعان الحربش والنائب محمد هايف والنائب الطاحوس والنائب وليد الطبطبائي وغيرهم من النواب اللي ما أتذكر اسماءهم كانوا أمس الأربعاء مع المتظاهرين في ساحة الإرادة، مع أي تجمع يصير نلاقيكم حاضرين ندوات في ساحة الإرادة ندوات في الدواوين السفارة السورية كنتوا موجودين السفارة الليبية موجودين احداث مصر موجودين زوارة الخميس هم موجودين في كل حدث فيه مظاهرة موجودين حتى الطلبه شيشتوهم وخليتوهم يسوون اعتصامات، انتوا ماعندكم بيوت تنامون فيها؟ 24 ساعة من اعتصام الى اعتصام ومن ندوة الى ندوة وياريت كلها سلمية وتصب في مصلحة البلد ما نشوف منكم الا اثارة الفتنة وتبون الشعب يقلب على الحكومة وسويتوا أعضاءها حرامية ومرتشين ليش انتوا وين بتوصلون البلد ؟ عندكم كلام يا سادة يا أعضاء قولوه تحت قبة قاعة عبدالله السالم اللي انتوا ما احترمتوها أمس باقتحامكم لها مع اللي ماشين وراكم اللي ماندري من وين مجمعينهم طقة عباس الشعبي وربعه، من كثر انهم مو شافين خير دشوا القاعة ويترقصون فوق الطاولات واللي يعدل غترته عشان يصور للذكرى بذمتكم شلة العصابة اللي دخلتوهم معاكم القاعة اشكال ناس تمثل شعب عظيم مثل الشعب الكويتي ؟

جاوبني يانائب يافاضل يا بطل سفينة الحرية الإطفائيين السبعة اللي تسرحوا نتيجة تحريضك وتشجيعك لهم باقتحام مكتب المنصوري، تدري عنهم رديتهم الى عملهم، والحين بعد ما ترفع البصمات في قاعة عبدالله السالم ويتم القبض على المخربين بما فيهم انتوا بتطلعونهم ؟

شوفوا اعضاء مجلس الأمة اللي قبلكم تعلموا منهم، كانوا يقولون في فساد ولكن ما شفناهم سووا اللي سويتوه كانوا يستخدمون الأدوات الدستورية تحت القبة البرلمانية بكل احترام، وبعدين تعالوا انتوا تهتفون بأن الشعب يريد من الشيخ ناصر المحمد أن يرحل استجوبتوه اكثر من مره وفي كل مره يتم التصويت على طرح الثقة يفوز سموه بالثقة، اشلون تبون تمشون رايكم على راي الأغلبية فهموني ؟

الكويت تعيش في هذي الأيام فساد ولكن فساد اثارة الفتنة واثارة الفوضى والتحريض على المظاهرات والخروج الى الشارع واقتحام المكاتب والمقرات هذا الفساد الحقيقي وانتم بؤرة الفساد يا أعضاء مجلس الأمة لأنكم انتوا اللي حرضوتوهم على ذلك،
لذلك احنا من الشعب الكويتي نقول لكم ارحلوا ارحلوا ارحلوا الشعب يريد تغيير الأعضاء
 



اتمنى اذا تم القبض على المخربين ان تتم معاقبتهم اشد العقوبات ويتم تطبيق القانون عليهم وان يتم اسقاط الحصانة عن النواب المحرضين ومعاقبتهم حتى يكونوا عبرة لكل من يحاول أن يزعزع أمن البلاد
بسم الله الرحمن الرحيم
” وإذا مرضت فهو يشفين “


بحمد الله جاني خبر انه الكابتن عبدالعزيز العنبري رخصوا من المستشفى وهو الآن يتمتع بصحة جيدة ، وطلب الأطباء منه أن يلتزم بالعلاج مع المراجعة .
واحنا نقول لبوسعود ألف الحمدالله على السلامة وأجر وعافية


المخلص عبدالعزيز العنبري

بسم الله الرحمن الرحيم

” وإذا مرضت فهو يشفين “

 تعرض اللاعب السابق لنادي الكويت الرياضي والمنتخب الوطني الكابتن الكبير عبدالعزيز العنبري لأزمة قلبية أدخل على أثرها المستشفى، وذلك مساء يوم الخميس الموافق 10 / 11 /2011 م.
وقد قمت بزيارته اليوم للإطمئنان عليه والحمدلله أن مرحلة الخطر عدت وجاري انتظار نتائج بعض الفحوصات للإطمئنان على صحته.
نسأل الله أن يشفيه ويطلع لنا بالسلامة وما تشوف شر يا بوسعود