برنامج اعادة هيكلة القوى العاملة




اليوم موضوعنا يهم شريحة من الشباب اللي يشتغلون بالقطاع الخاص، بعض منهم شكوا لي معانتهم مع هذا الجهاز الحكومي الحلو.

يقول فلان الفلاني :

كنت موظف في القطاع الحكومي من عشر سنوات، ومع صدور قانون القطاع الخاص قلت في نفسي يالك الفرج في القطاع الخاص الواحد ممكن يثبت جدارته ويقدر يطور من نفسه ويبتعد عن الروتين الممل، صج انه الشغل متعب شوي لكن التقدير والراتب الزين ينسيني التعب.

المهم جهزت نفسي وضبطت هذيك السيرة الذاتية اللي ماكوا مثلها وواحد من الربع يعطيه العافية نصحني اني احط صورتي في السيرة الذاتي ورحت الحلاق وحسنت اللحية وخففت الشنب صغرت 15 سنة وصورت، الحمدالله توفقت واتفقت مع شركة واشتغلت فيها في 2003، وهني بدأت المعاناة.

بعد ما قدمت استقالتي من الوزارة وأخذت الأوراق المطلوبة من دعم العمالة علشان العلاوة الاجتماعية طبعا لفيت على التأمينات وديوان الخدمة والوزارة ووزارة التجارة علشان اثبت انه ماعندي رخصة تجارية وبعدين العدل وعقبه بنك التسليف الى آخره، وأخذت كل هالأوراق وقدمتها الى دعم العمالة، طبعا كنا وقتها في أول شهر 12 – 2003 أول مادخلت رحت كالعادة الى الجهاز الخاص بالأرقام أبي رقم وكان في موظفة قاعدة سألتني قلت لها انا متوظف بشركة وأبي اقدم أوراقي قالت لي تفضل اخذ رقم لفيت ويهي على الجهاز علشان أخذ الرقم تفاجأت انه مايشتغل رفعت راسي على الموظفة بسألها لقيتها ماسكة ورقة وكاتبه عليها بقلم ألوان شينية الرقم وقالت لي الجهاز بعده ما علومونا عليه أخذت منها الرقم وقعدت، وشوي تقول كأنه قاعدين بفلم الحدود مال دريد لحام، يانا واحد وقف بالنص وينادي الارقام، قدمنا المعاملة وخلصنا وسألت الموظف اللي موجود متى تنزل العلاوة ان شاء الله؟ رد علي وكله ثقة اذا مو آخر شهر ديسمبر 2003 راح تكون بشهر يناير 2004 عبارة عن راتبين، تدري على ما تاخذ المعاملة اجراءتها قلت على خير، طبعا انا مثل أي مواطن كويتي موظف ومتزوج عندي عيال، الله يخلي لكم عيالكم، وعلي التزامات قروض وأقساط، قلت ميخالف اتحمل شهر المهم عدى شهر 12-2003 وما نزل شي قلت الريال قالي بشهر يناير بينزل راتبين، ويا شهر يناير وعدى وعقبه فبراير وشفط ومارس يسلم عليكم وانا اتصل عليهم مره واراجعهم وكله يصبروني واحد يقول لي هاليومين (طلع يقصد هالشهرين) والثاني يقول لي انت حسابك بالبنك الفلاني هذا يتأخر التحويل لو فاتح حساب بالبنك الفلاني اللي نتعامل معاه بسرعة ينزل، والثالث مسوي دمه خفيف يقول لي أحسن احنا نيمع لك الرواتب هههههههه على باله دمه خفيف الله يلوع جبده، وانا اقول لهم عندي التزامات ياجماعة مايصير جذي طبعا البنك جزاهم الله خير متفهمين الأمر لأن أغلبهم كويتيين وعانوا من دعم العمالة اما الشركات اللي تطالبني إن صبرت شهر ماتصبر شهرين وحسبوا علي غرامة تأخير وزين ما سوولي منع سفر وسوالف القرعان هذي، وارجع اقول لهم من يتحمل هذه الأخطاء اللي مالي ذنب فيها، هني طلع لي واحد من موظفين دعم العمالة الظاهر اهو الحكيم فيهم وقال لي كلمة الصراحة كادت مشاكلي إلا شوية تدرون شنو قالي : ليش يا يبا تسوي جذي، الله يهديك تطلع من الحكومة وتبهدل نفسك كان قعدت بوزارتك أبرك، شفتوا الرد عجيب، صراحة رفع من معنوياتي.

المهم نزل الراتب ومعاه زيادة بأثر رجعي وسوينا حفلة انا وعيالي وقتها، طبعا دعم العمالة قالوا لي أول ما سجلت عندهم ان اهم موبس يعطوني راتب العلاوة لا اهم موجودين لحمايتي اذا تعرضت حق اي مشكلة وظلمني صاحب العمل ايي واشتكي وأهم ييبون حقي ، المشكلة انه الشركة التزمت معاي من قبل لا أوقع العقد يعني انا بآخر شهر 11-2003 تقريبا دوامت اسبوع تحت التجربة من هذا الاسبوع يومين اجازة العيد ويوم جمعة يعني من الاسبوع هذا دوامت 4 أيام، موعلشان أهم يقيموني لا أهم خلاص اقبلوني بس علشان انا أتعرف على طبيعة الشغل وأقرر اذا حاب اشتغل ولا لأ تصدقون أنهم عطوني راتب اسبوع ماقصروا والله، الحين منو اللي بياخذلي حقي اذا انظلمت، المهم طبعا تمر الشهور وراتب الشركة ينزل بموعده اما دعم العمالة مره ينزل ب25 الشهر ومره 26 ومره 29 وساعات يوصل 30 ولا كل سنه في شهر ابريل يعني المفروض ينزل بآخر مارس يتأخرون ويوصل ليه 5 ابريل والسبب يقولون عندهم ميزانية، ياسلا م.

الحين احنا الموظفين بالقطاع الخاص أول شي نعاني منه انه الراتب مقسم بين الشركة وبين دعم العمالة ودعم العمالة يتأخر ساعات والبنك اذا نزل راتب الشركة يحجزون عليه عندهم ليما ينزل راتب دعم العمالة علشان يقصون قسط القرض وانا خلال الفترة هذي اطق اصبع.

وقتها قلنا احنا مجموعة من العاملين بالقطاع الخاص ليش ما تقومون بصرف الراتب مال دعم العمالة الى الشركة اللي نشتغل فيها والشركة تنزل لنا راتب كامل حالنا حال غيرنا، قالوا لنا انه اهم مايثقون بالشركات يمكن يبوقون رواتبكم اذا الشركات ملتزمة معانه من أول ما وقعنا العقود، وما أعتقد انه في شركة من شركاتنا الكويتية واللي يملكها أو مجلس ادارتها ناس عيال عوائل معروفه ومحترمه وناس أجاويد ولهم وزنهم بالبلد راح تهف نفسهم ويطالعون راتب موظف عندهم.

هذي كانت معاناتي مع دعم العمالة من أول ما سجلت عندهم والمستمرة الى اليوم، تعالوا الحين شوفوا المراجعه عندهم واذا تبي شي منهم مثل شهادة الراتب أو غيرها سمعوا! بس أتمنى أن تكون عندكم سعة صدر، وأعتذر لكم على الإطالة، بس الموضوع يحر المهم بقولكم شغلة وانتوا قارنوا، قبل فترة دخلت موقع التأمينات الاجتماعية ولقيت عندهم الخدمة الالكترونية للمواطنين سجلت فيها وعطوني موعد لمراجعتهم علشان استلم كلمة السر ورحت واستلمتها عقب ما تأكدوا من هويتي وعطوني كلمة السر داخل ظرف مثل طريقة البنوك لما تستلم الرقم السري وطبعا هذا محافظة على خصوصية وسرية المعلومات، خوش؟ سويت نفس الشي حق دعم العمالة وقالوا اراجعهم، ورحت وسألت هناك قالوا انزل السرداب عند الحاسب الآلي يعطونك كلمة السر، ونزلت السرداب وافتر بين المتاهات هناك وضيعت، كان أسأل واحد قلت له وين الحاسب الآلي أبي استلم كلمة السر مالتي قالي : تشم ريحة الفطاير قلت له اي قالي الحقها توصلك، المهم وصف لي المكان ورحت وفعلا لقيت بوفيه مفتوح صغير حتى لما طلبت من الموظفة تضايقت شوي لأني قطعت ريوقها ويمكن اللي معاها يخلصونه قبلها، أقدم اعتذاري لها بهذه المناسبة، قامت الموظفة وخذت مني البطاقة المدنية وتأكدت بعدين تفاجأت تعطيني كلمة سر عبارة عن اربع ارقام كاتبتهم على الورقة الصفرة اللي تلزق، كان اسألها هذي كلمة السر اي ؟ سألته بكل براءة يعني هذي مبدأية ولما أدخل النظام يطلب مني أغيرها صح؟ ردت لأ ماتقدر تغير كلمتك السرية، اووف تدرون شنو معنى هذا انه ماكو عندهم خصوصية ولا سرية المعلومات وممكن أي أحد يطلع على بياناتي، شفتوا اشلون المعاناة؟

أكتفي ليه هني بسالفتي وأرجو أني ماطولت عليكم فيها.

وزارة لأشغال ومنطقة مشرف



خلال الشهور القليلة الماضية، كانت منطقة مشرف ضحية لوزارة الاشغال من حيث تعطل محطة مشرف للصرف الصحي، مانبي ندخل بالأسباب ولا مستجدات المشكلة ، لكن مع بداية العام الدراسي، وبسبب التخطيط عند وزراة الاشغال وقعت مشرف ضحية مرة أخرى للوزارة .
في أول يوم دراسي تفاجأ أولياء الأمور بأن هناك أعمال صيانة للطرق وبناء دوار عند قطعة 5 بالتحديد عند مدارس البنات، طبعا هذي الأعمال سببت ازمة مرور طبعا في أيام الدراسة الشارع يكون زحمة من غير شي والحين بعد في ناس يشتغلون بالشارع وحفريات، يعني المكان اعتفس اولا زحمة مرورية، هناك خطورة على بناتنا من كثر الحفر طبعا الحمدالله انه مافي طابور بناء على تعليمات وزارة التربية علشان انفلونزا الخنازير بعيد عنكم، ثانيا بنات المدرسة الابتدائية صغار السن الخطر عليهم اكثر خصوصا عند نهاية الدوام قد خروج البنات مع وجوود هؤلاء العمال اللي ماندري شنو ملتهم وحالتهم.

سؤالي : ليش الوزارة ما أنجزت هذه الأعمال خلال العطلة الصيفية؟

الله يحفظ عيالنا وعيالكم

مرحبا بكم

بداية...أود ان ارحب بكم بزيارة مدونة الفيلكاوي وكلي أمل أن تنال رضى واستحسان كل أنسان أحب الكويت ويعشق ترابها، سوف يجد كل من يزور هذه المدونة مقالات عما يدور من حولي من أحداث سواء سياسية أو أو ثقافية وتعبر عن رأي مواطن كويتي بسيط من جزيرة فيلكا ليس له توجهات حزبية أو عرقية ولا قبلية ولاطائفية سوى حب بلاده الكويت، كما أرحب بآرائكم وانتقاداتكم البناءه.