تحية الى بودعيج




وين أيام الجنسية الحمرا

أتحدى أي طرثوث لحق على هذي الوثائق
واذا كانت عنده أكيد قطها لما صار الغزو

دبي التي رأيت

مبارك عليكم الشهر، وتقبل الله طاعكتم



اليوم بقولكم عن سفرتي انا والعايلة الى دبي، أكيد راح تقولون شنو اليديد الكل فيكم شاف دبي لكن أرجو انكم تتحملوني الى النهاية، في أول شهر أغسطس كان موعد اجازتي السنوية وبما أن شهر رمضان الكريم يصادف في نفس الشهر قررت أسافر الى دبي منها تكون رحلة خفيفة واذا صادف رمضان وانا هناك ما أحس بفرق، وصلنا دبي وفي اليوم الآول قررنا نروح دبي مول عن طريق المترو طبعا المترو الحين شغال اللهم بعض المحطات وما شاء الله شفت هذا الانجاز الأكثر من رائع، وصلنا محطة برج خليفة واخذنا تكسي الى دبي مول ( على فكرة ترا تقدرون تروحون المول من المحطة مشي بس اذا كنتوا نفس حالتي ومعاكم يهال التكسي أفضل) المهم دخلنا هذا المول العجيب واللي يحسسك انك في أوروبا المهم مابي اقول لكم عن المحلات بس بتكلم عن أماكن التسلية الموجودة هناك، أول شي بالنسبة حق اليهال الصغار ما تحتاج عربانة لأنهم يأجرون سيارات صغيرة حق اليهال أدري بتقولون موجود عندنا بالكويت لا ماعندنا مثلهم لان السيارة مجهزة بشاشه صغيرة تعرض أفلام كرتونية يعني ماتشوف اليهال راكبين السيارة ويصارخون أو يبكون او واقفين ملوا من القعدة.

وأجارها 150 درهم اماراتي 50 ايجار و100 تأمين تستلمها لما ترجع السيارة ومدة التاجير غير محدده المهم ترجعها قبل لا يسكر المجمع ( يابلاش) عندنا بالكويت الاجار بالساعات وثلاث ارباع الوقت الياهل يمشي ونحط اغراضنا فيها، المهم قررنا ندخل الأكواريوم طبعا كحجم أصغر من المركز العلمي عندنا لكن بالمحتويات لا يقارن شوفوا الصورة





لا تعليق طبعا

المهم في المول عيالي دخلوا كيدزانيا وهو عبارة عن مكان خاص بالعيال اللي أعمارهم من 3 الى 17 سنة وفيه يقدرون يمارسون أي وظيفة تناسب ميولهم والمكان عبارة عن مدينة صغيرة يعني المكان عجيب، للأسف ماعندي صور حاليا لكن خلال فترة دخول عيالكم واللي تاخذ مده ممكن توصل 4 ساعات واذا مالكم خلق تدخلون معاهم تقدرون تنتظرونهم في ردهة المطاعم أو اذا كان الجو حلو ممكن تقعدون في الساحة الخارجية يم برج خليفة ومقابل النافورة الراقصة مثل نافورتنا اللي يم الاسكيتنج منتوا مصدقين شوفوا الفلم


واليوم اللي بعده رحنا برج خليفة اللي اعجوبة من عجائب الدنيا وأطول برج في العالم، طبعا أعجز عن الوصف لكن اتركم مع بعض الصور.




في قاموس القادة لامكان لكلمة " مستحيل "

ومهما كبرت التحديات، فإن قوة الإيمان والعزيمة والمثابرة كفيلة بالتغلب عليها

- صاحب السمو الشيخ محمد بن راشد آل مكتوم





هذا جزء من صورة كبيرة موجودة لما طلعنا من البرج الاشخاص الموجودين بالصورة اهم فريق العمل في برج خليفة من النجار والفني الى مدير المشروع على فكرة الصورة مو مرتبة يعني ممكن الفني قبل المدير

طبعا خلال هذه الجولة ما شفت ( قرطاس ) على الأرض نظافه في كل الأماكن اللي زرتها حتى العمال اللي يقومون بتنظيف انظاف وأنيقين ويقومون بشغلهم بضمير مو مثل البنغالية اللي عندنا تشم ريحته قبل ماتشوفه وما ينظف الا لما يمك علشان يسلم عليك وتعطيه المقسوم وبعدين يروح عنك، قمت اتساءل ليش كل هذه الأشياء موموجودة عندنا بالكويت، انا ما أحسد أهل الامارات والله لا يغير عليهم، واحنا نفتخر انه عندهم مثل هذه الانجازات، لكن الواحد يحس بالغيرة خصوصا لما نكون احنا كنا السباقين في مثل هذه الانجازات وكان يضرب فينا المثل بالاضافة انه اغلب الاستثمارات هناك نشوفها بأسماء كويتية، شي آخر لفت نظري وهو النظام والالتزام في القوانين، والقانون مايعرف الواسطة، على فكرة وانا واقف عند الجوازات لما وصلنا بالمطار لاحظت وجود كامره ورى الموظف اللي عرفته انها لمراقبة القادمين والموظفين في نفس الوقت يعني ماكوا مجال أحد يخطر دورك حتى لوكان يعرف أحد من الموظفين، طبعا قعدت اسولف مع واحد من الاخوان الاماراتيين، قال لي بصراحة انتوا الكويتيين محد مضيعكم الا ( ميلس الأمة ) مالكم، قعدت أفكر بكلامه واقارن احنا للأسف مجلسنا بعض النواب فاهمين الديموقراطية أو متعمدين يفهمونها غلط وقفوا الكثير من المشاريع التنموية لأنهم مايستفيدون منها وياخرون الكثير من القرارات اللي تنفعنا كمواطنين وبس فالحين يالاستجوابات اللي مامنها فايده، صح احنا في السبعينات في فترة حكم الشيخ صباح السالم رحمة الله عليه، كان المجلس منحل حل غير دستوري وقتها يمكن تذكرون شلون كانت الكويت في هذه الفترة كان جميع دول الخليج تنتظر العيد الوطني علشان تشوف الكويت اشلون تحتفل أو تنتظر لما الكويت تنظم حدث معين عشان يشوفون شنو راح تسوي الكويت من فناتك مثل مايقولون، حتى في عهد فترة الثمانينات بوجود المجلس لما كانوا أعضاءه ناس عيونهم متروسة ومهما صارت الاختلافات بينهم مصلحة الكويت فوق الكل عندهم، لكن مجلسنا في الفترة الاخيرة والاشكال اللي دخلوا المجلس لينالوا مصلحتهم الشخصية هذا اللي خلانا نتراجع بعد ما كنا في المقدمة، يعني هل هناك شك بأنه الكويت ماتقدر تبني برج مثل برج خليفة ؟ برج خليفة ابتدأ فيه البنيان مع بداية الشغل في نفق دوار الجوازات عندنا وانتهى بعده بسنتين ليش؟ لما شارع ونفق ياخذ كل هذا الوقت وين الخلل بوق ؟ البوق موجود بكل مكان، لما استاد جابر ياخذ كل هذا الوقت في البنيان وبعدين تطلع لنا أخطاء كثر شعر الراس والى يومنا هذا ما صار فيه اي مباراة وفي المقابل ونفس المقاول اللي بنى استاد جابر يبني ملاعب بطولة كأس العالم بجنوب أفريقيا ويسلكها خلال ثلاث سنوات ما نتساءل ليش ؟



انا أقول لكم أنه الكويت تقدر تبني برج مثل برج خليفة، والدليل شوفوا المباني قبل مثل المدارس قبل والمدارس الحين، اما من ناحية المباني وهل تشكون انه الكويت ماتقدر تقدم ملف لتنظيم كأس العالم مثل قطر الشقيقة؟ أيام الشهيد فهد الأحمد أقولها بكل ثقة كان رئيس الاتحاد الدولي هافيلانج مايشك خيط بإبره الا لما يرجع حق الشهيد فهد الأحمد، واسرائيل محد طرها الا الشهيد رحمة الله عليه، والحين بالرياضة كل من يطقنا من الاتحاد الدولي الى بن ....همام هذا اللي ماكان يتجرأ يبطل حلجه أمام الشهيد كل هذه الذكريات والافكار واشياء ثانية سرحت فيها لما كنت اتكلم مع أخوي المواطن الاماراتي الطريف في الأمر كنا قاعدين نشوف مباراة منتخب الكويت الأولمبي ومنتخب الامارات النهائية في كأس الخليج لتحت 23 سنة اللي نظمتها قطر وصحيت على صوت المعلق الاماراتي وهو يقول احنا قاعدين نلعب مع منتخب الكويت ملوك الكرة الخليجية نلعب مع دليل العرب لكأس العالم، شفتوا شلون ينظرون لنا، فعلا لما الواحد يتذكر حالنا قبل ويشوف حالنا الحيل بوجود نواب الطراثيث يعوره قلبه.


هذي كانت سالفتي خليتها بلا نهاية والتعليق لكم


أمنية : بمناسبة شهر الرمضان الكريم، أتمنى اشوف القرقيعان السنة مثل أيامنا قبل اليهال يدورون بالفرجان ويغنون سلم ولدهم ، والبنات قرقيعان وقرقيعان وكل واحد معلق كيسه برقبته، وايد أحسن من توزيع القرقيعان بعلب وكل عايلة بيوم الزواره يسوون قرقيعان عائلي، والله ولهت على (ويص ويص في بيتكم ...............)