الأسد يمرض لكن ما يموت





كلنا تابعنا في اليومين الماضيين ماحدث للمواطن الاسد محمد الجويهل، كنت كاتب مقالة لكنها مسحت بسبب الطرثوث اللي اخترق الموقع وكان عنوانها اليوم قناة سكوب من التالي وكانت تتحدث بصورة عامة على الاشخاص اللذين يقومون باخذ مايسمونه حقهم بذراعهم، ما حصل للجويهل لايمكن أن نقول هذا صار بالكويت وما لا يصدقه العقل انه صار من نواب يمثلون الامة وفي بيت نائب كان في يوم من الايام رئيس مجلس الامة ويعتبر اكبر سنا من معظم الاعضاء يعني لازم يكون قدوة، كون لنفسه صورة حبوها كل الكويتيين خصوصا لما كان يدافع بكل بسالة عن حقوق الكويتيين امام رئيس البرلمان العراقي، لكن هدم كل اللي بناه وكل تعب السنين الطويلة بلحظة تحالفه بالأخ ضمير الأمة صاحب الحنجرة الذهبية نصير الطراثيث وانضم معهم بقية النواب ابطال الاستجوابات، كل هؤلاء من يدعون انهم حماة الدستور ويخافون على مصلحة الشعب والوطن اهم في الحقيقة يعملون بكل أوتوا من جهد لمصالحهم الشخصية وللمحافظة على كرسي المجلس ومحتفظين بالحصانة البرلمانية اعتقادا منهم انهم يكونون فوق القانون ويقدرون يسوون اي شي يبونه يخدم مصلحتهم، ولعلمهم الاكيد بأن أبناء الكويت الشرفاء اللي ولاءهم للكويت فقط ولا لغيرها ماطوف عليهم غزعبلاتهم اللي يسوونها فمن واجبهم المحافظة على الطراثيث مزدوجين الجنسية لان هؤلاء الطراثيث هم من يصوتون مقابل المادة وماله شغل بالوطن وبالكويت تدرون ليش لان لما تروح الكويت يطلع جنسيته الثانية مثل ما صار سنة 90 لما صار الغزو كل الطراثيث قطو جناسيهم بالزبالة وطلعوا جناسيهم الثانية وكل من راح حق ديرته ولما سمعوا انه سفارات الكويت تصرف معاشات حق الكويتيين أيام الغزو هم راحوا وخذوا المعاشات لا وفي ناس سجلوا نفسهم بأكثر من دولة تبون أكثر من جذي نفس دنية أزيدكم من الشعر بيت لما أمير القلوب رحمة الله عليه أمر بصرف 500 دينار للكويتيين الموجودين بالداخل بعد التحرير دخلوا وكل رب أسرة دخل الديرة ومعاه البطايق المدنية حق اهله وادعى انه كان موجود داخل الكويت أثناء الغزو، ادري انه أغلبكم يدرون بهذا بس انا ذكرته من باب التذكير، الحين صارلنا 20 سنة من الغزو واحنا نعاني من الطراثيث ولكن في البداية ماكنا حاسين فيهم وهم يدخلون بيننا مثل المرض اللي ينتشر بالجسم مانحس فيه الا بعد ما يتمكن وهذا اللي صار تمكنوا ولقوا اصوات وناس تدافع عنهم وهذ اللي قوا شوكتهم، فحبوا يتمادون أكثر ويفرضون شريعتهم وقوانينهم علينا وهي شريعة الغابة وقانونها سهل وبسيط وهو يا انك تكون معاي وتوافقني رايي وتساعدني في اللي اسويه مهما كان صح أو غلط ياما اشيلك من طريجي حتى لوكان هذا يكلفك حياتك، وهذا اللي صار مع الجويهل مايعرفون يناقشون ولا عندهم خبره في فنون الحوار قاموا واعتدوا عليه بالضرب بنية قتله والدليل انهم كانوا يبون يقتلونه ما سمعناه من التصوير يوم الحادثة.


انا اقول الجويهل غلطان نعم غلطان لأن لبى الدعوة لحضور الندوة وظن انه بروح حق ناس لازالوا كما يدعون انهم متمسكين بعادات الكويت واهلها بل عادات العرب جميعا واللي هي بكل بساطه تقول طالما الرجل ضيف عندي وفي بيتي فهو في حمايتي حتى لوكان غلطان في حقي وظنونك يابودعيج ماهي بمحلها للأسف، انت رحت وحضرت لكنهم مبيتين النية لك ولا من وين طلعت العصي والصاعق انا اللي اعرفه انه الواحد لما يروح ندوة ياخذ معاه ورقة وقلم علشان يسجل ملاحظات آلة تسجيل عشان التطور لكن ياخذ معاه عجره او صاعق كهربائي أول مره اسمع فيها، وفوق هذا كله وهو ما استنكره جميع الناس من مؤيدين ومعارضين للجويهل انه بعد ماتم الاعتداء عليه بدل ماتوقف الندوة يا السعدون ياصاحب الديوانية وتقوم وتسوي أقل مايمكنك فعله وتاخذ الريال أو حتى تطل عليه أو تركب معاه سيارة الاسعاف لو توصل معاه الى باب الطوارئ ، تقوم تكمل ندوتك مع حلفاءك بكل دم بارد، صدق لمن قال السيد/طلال السعيد في قناة سكوب لو الغيت الندوة ورحت مع الجويهل كان في ناس حبتك وكرهت الجويهل لكنك تصرفت وكانك شريك بهذا الفعل انت ومن معك من أعضاء مجلس الأمة اشلون تبون الشعب يأتمنكم على نفسه اشلون تبونه نثق فيكم والا صج نسيت احنا مانهمكم انتوا يهمونكم الطراثيث اللي قاموا بالواجب مع الريال، ممكن تقولون يا نواب يا محترمين اللي كنتوا موجودين بالندوة اشبينكم وبين الجويهل؟ ليش هذا العداء معاه؟ أهو تكلم عن مزدوجي الجنسية وهذي ماده في الدستور الكويتي اللي قاعدين تدافعون عنه ليش معارضين هالمادة؟ هل في بينكم يانواب من يحمل جنسية غير الجنسية الكويتية؟ علمونا، شنو سوالكم الجويهل سبكم ؟ القضاء موجود واللي له حق بياخذه، غلط عليكم ؟ انتوا ماقصرتوا فيه في تجمعاتكم وماخليتوا كلمة الا وقلتوها عليه، لكن اهو لجأ للقضاء لأن يؤمن بأن احنا نعيش في دولة يحكمها القانون.

والحين يا اخون اللي صار حق محمد الجويهل ممكن يصير لأي شخص يعارضهم هل راح نوقف ونشاهد؟ ولما يلجأ الجويهل الى القضاء هل راح ننتظر ان يجتمع المجلس ليصوت على رفع الحصانة عنهم؟ اهم الندوة اللي سووها وقالوا الدستور وحماية الدستور وكل هذه البهرجة علشان الحكومة طلبت رفع الحصانة عن فيصل المسلم عاد هذا سالفته سالفه ياخي انت واثق من نفسك ارفع الحصانة وواجه مو تروح لي قناة الجزيرة تتشكى بس زين يسوون فيك اللي دقوا وبالذات المصري اللي مارديت عليه ولا سكته المذيعه ردت عليه وانت لا انا مالي خلق اتلكم عن سالفة المسلم، لكن أتمنى انه موضوع الاعتداء على محمد الجويهل مايعدي على خير ولازم الجاني ياخذ اقصى العقوبات حتى يكون عبرة لكل من يحاول أن يفرض شريعة الغابة ويغتصب الديموقراطية ويكمم الأفواه واذكركم احنا بالكويت بلد الحريات ديننا الاسلام دين السماحة وتحت راية حكامنه الصباح الله يعزهم اهم اللي اعطونا حرية التعبير عن الراي فيجب ان نحترم هذه الحرية ونستخدمها في مصلحة بلدنا .


هذه سالفتي اليوم وما أقول الا حفظ الله الكويت وشعبها من كل مكروه في ظل والدنا صاحب السمو الشيخ صباح الأحمد الصباح وولي عهده الأمين سمو الشيخ نواف الاحمد الصباح والحكومة الرشيده بقيادة سمو الشيخ ناصر المحمد الصباح
وكل عام هجري وانتم بخير ......

أرحلـــــــــــــــــــوا جميـــــــــــــــــــــــعا
 






مدونة الفيلكاوي

السلام عليكم



عيدكم مبارك وعساكم من عوادة وعسى ان شاء الله العام القادم نكون جميعا مجتمعين في عرفات قولوا آمين.


الحمدلله اني قدرت استرد مدونتي بعد ما تم اختراقها ومسح جميع المقالات اللي كتبتها، والحمدلله انه معاي نسخ احتياطية لجميع المقالات اللي تم مسحها، الصراحة فكرت وايد شنو أكتب رد على هذا الفعل، لكن قلت قبل لا أكتب اي كلمة ضروري اراجع مقالاتي يمكن على الرغم من اني متأكد اني ماغلطت، وحسب تربيتي واخلاقي ما سبيت أو غلطت على أحد، وفعلا مالقيت شي، وبامكانكم تقرون المقالات كلها وتراجعونها انا قعدت اتساءل ليش صار حق المدونة اللي صار قمت ادور وين الغلط اللي سويته؟ دورت مالقيت


حسب مايدعي الطرثوث اللي سوى الشغلة الصبيانية هذي انه مسح المقالاات احتجاجا على احدى المقالات عن السيد / محمد الجويهل، أولا انا ما اعرف الجويهل وعمري ما التقيت ولا اهو يعرفني وحتى يوم كان مرشح نفسه ما حضرت له اي محاضرة أو ندوة، لكن كل اللي سمعتنا من هذا الرجل انا مقتنع فيه يقول كلام منطقي، بعض الاخوان وصلتني منهم رسايل على الموبايل قالوا لي زين يسوون فيك، لأنك ماتعرف حقيقة الجويهل، هذا حرامي وهذا ينصب على الناس و....و...و...و..كلام كثير، انزين اهو قاعد يهاجم مزدوجي الجنسية وهذا شي كل الكويتيين موافقين عليه ومااعتقد انه الكويتيين يعارضون احدى مواد الدستور التي تمنع أن يكون المواطن يحمل جنسية أخرى الى جانب الكويتية، ونتيجة مهاجمته لهؤلاء تعرضوا له بعض أعضاء مجلس الأمة المنتفعين من وراء هؤلاء المزدوجين، الرجل تكلم عن شخص لا يحترم الكويت بابسط الامور وهو الوقوف عند النشيد الوطني بعد ما الكويت رزته وصار عضو في برلمانها وأقسم على احترام دستورها في أحد يقدر ينكر هذا؟ ايضا هاجم من تلاعب بمشاعر المواطنين ووعدهم بان يسقط القروض عنهم واقسم لهم وهو من وراهم مسويله الصاله اللي حاطها ويستنفع من وراها يكون بيصير نفس بودي، ولا شيخان الفارسي ، أو الميلم هؤلاء اللي بنوا الصالات ويقدمونها للمواطنين بالمجان مومثل ماشفنا في السراية الاخيرة 400 دينار اجار الصالة.
اما الشخص الثالث اللي طلع وهو يهاجم ويقول باعلى صوته تسقط الحكومة ويسقط رئيسها هذا طبعا مادري شلون دخل معاهم يمكن حب يسويله حركة أو دور ، اما هذا اللي مسمي نفسه ضمير الامه صاحب الحنجره الذهبية واللي ماخلى أحد ما تهاوش معاه وماخلى أحد الا وسبّه واذا أحد كلمه رفع عليه قضية .
الحين هذيله الناس اللي هاجمهم الجويهل وعنده الوثائق اللي تثبت صحة كلامه، اما اللي هاجموا الجويهل وادعوا عليه ما ادعوا شنو دليلهم على صحة كلامهم ماشفنا شي، اذن انا في هالحالة منوا اصدق ؟

انا يمكن قلت من قبل انا مع الجويهل في القضية اللي طرحها وراح ادعم رايه لانه نفس رايي وان يجب وضع حد لهذه الظاهرة دخول اشخاص لا يحملون اي معنى من معاني الولاء للوطن وهدفهم استنزاف خيرات البلد وبالتالي الذهاب والبحث على دولة ثانية لاستنزافها، وهناك أشخاص رايتهم بعيني وسمتعهم آذاني في احدى العزايم ياكلون من الكويت ويدعون بطول العمر للبلد المجاور.

هذا موقفي من السيد / محمد الجويهل، وهذا رأيي في مزدوجي الجنسية ، لكن هذا مايعطيك الحق ياللي دشيت الموقع تمسح كل اللي فيه الا اذا الكلام اللي كان مكتوب عوّرك وحسس على البطحة اللي على راسك لدرجة انك فقدت عقلك المغسول بافكار معتقدات خلتك ما تمسك نفسك وتهكر على المدونة وتمسح محتوياته وتظن بفعلتك انك قضيت على واني ماراح ارجع واتكلم، انت ياللي تدعي باني أحمل فكر مسموم فاذا كان حبي وعشقي للكويت صار فكر فكر مسموم فياحلاة هذا السم واتشرف بان يكون جسدي مسموما بحب الكويت، انت ماقمت بفعلتك هذي الا لأن الموضوع يمسك يعني أنت أحد مزدوجي الجنسية يعني انت ممن تأكلون من خير الكويت وتشكر غيرها، انت ممن تنكر للكويت يوم 2/8/1990م ورميت الجنسية في سلة المهملات وركضت الى بلدك الاصلي تقدم له الولاء والطاعة ولما رجعت الكويت لأهلها رجعت علشان تكمل نهب واستنزاف لخيرها، الحين منوا اللي عنده فكر مسموم انا ولا انت؟ رسائل التهديد اللي وصلتني عن طريق البريد الكتروني تأكد أنها ماهزت شعره فيني لانك جبان تخاف المواجهة، لكن انا حركتك هذي زادتي قوة لاني مؤمن بالمقولة الضربة التي لاتقتلك تزيدك قوة.

هذي سالفتي اليوم واتمنى اتكلم معاكم بالفة افضل في المرة الياية .

عودة مدونة الفيلكاوي



ماراح أتكلم الحين سوى أني أقول الحمدالله اني قدرت ارجع مدونتي، والى من قام باختراق الموقع وتخريب مافيه أقول لك مثل ما قال الجويهل :
أدهن ظهرك وانطر ردي

مدونة الفيلكاوي على الـFacebook

السلام عليكم


أتشرف بدعوتكم بزيارة صفحة الفيلكاوي والتي هي مرآة للمدونة .....على الـ facebook وبزيارتكم تزداد صفحتي نور، كما بإمكانكم متابعتنا على موقع twitter


رابط الصفحة على ال facebook                           رابط الصفحة على twitter


ولكم تحياتي

كل عام دراسي وانتوا بخير


انا قايل اني ما راح اكتب الا مع بداية السنة الجديدة لأسباب خاصة، ماعلينا المهم سالفتي اليوم عن شغلة حصلت يوم الخميس الموافق 7 اكتوبر في (معتقل) ثانوية صالح شهاب في منطقة مشرف، والله العظيم اني احب هالمدرسة وتكلمت عنها من خلال ناظر المدرسة السابق الاستاذ/ سلمان الشطي الله يطول بعمره، لكن اللي يحصل بصراحة لا يقبله المنطق، في طابور الصباح يوم الخميس كل الطلبة وقفوا عادي ولأن الشنط المدرسية تعيقهم أثناء القيام بأنشطة الطابور المعتادة مثل تمارين الصباح وتحية العلم ........الخ قاموا بعض الطلبة واسندوا شنطهم على الحائط خلفهم المصيبة انه المدرسين قفلوا من هذي الحركة واصروا انه كل طالب يخلي جنطته يمه (حشى مو طلبة عمالة آسوية بسافرون وبفتشونهم ) فقاموا المدرسين مشكورين شالوا كل الجناط وودوهم بمكان غير معلوم في المدرسة (شوفوا العقاب الحديث) وبعد ما انتهى الطابور الطلبة يسألون عن جناطهم بيحضرون الحصة، مدرس قالهم عند التربية البدنية راحوا التربية البدنية المدرس هناك قالهم ماكوا راحوا الادارة عمك أصمخ يدورون الجناط ويحاتون الحصة اللي بدت، يقولهم المدرس ردوا التربية البدنية يرجعون هناك يقولهم المدرس ماكوا جناط أصلا اليوم انتوا غياب ياسلام يعني أعاقب الطالب بالأسلوب هذا ومومهم تحصيله العلمي المهم يحسب غياب وكأن مدارس التربية مافيها الا مشكلة الجنطة لازم تكون يم الطالب بالطابور، ورجعوا الى الادارة والحمدلله كان في ولي أمر موجود وقته فالناظر أظهر كل صفات العطف والأبوة وطلب من مدرس التربية البدنية يعطيهم الجناط (الله يجزاك خير ياولي الأمر انك كنت موجود) ومدرس التربية البدنية طلع حاذف الجناط مادري بأي جناح بطريقة فوضوية خلونا من الكتب اللي في الجناط، ما فكرت يامربي يافاضل انه احتمال يكون طالب من اصحاب الجناط اللي رميتهم يكون مريض مثلا بمرض حساسية أو ربو ودواه حاطه معاه بالجنطة ؟ وبحذفتك هذي كسرت الدوا ما فكرت شنو يصير ؟ لما كنت أدرس في هذي المدرسة أدارة المدرسة وفرت لنا خزانة وعلى فكرة قبل ماتطرح الفكرة على مدارس الكويت وكان هذا اجتهاد من ادارة المدرسة، لما كنا نعاقب على شي كان عقابنا بزيادة الواجبات المنزلية، سؤالي لإدراة المدرسة شنو الضرر في أن الطالب يوقف بالطابور وموحاط جنطته يمه ؟ ولا هذي مجرد قرارات أعت..... ، وبعدين في شغله ثانية انا لاحظتها في جميع المدارس تقريبا وهي لما الطلبه يحضرون متأخرين يتم عقابهم في بعض المدارس بحرمانهم من الحصة الأولى، ليش؟ أغلب الطلبة يوصلونهم اهاليهم المدرسة والتاخير يصير من زحمة الشوارع الصبح والكل يشوف ويدري، وأغلب الأهالي يصلون عيالهم لأكثر من مدرسة يعني وين يلحقون ليش الطالب يعاقب على التأخير ؟ انا سمعت بالباصات اللي توصل الطلبة بس ماشفتها يعني شغلة بالعقل ياجماعة. موقف حصلي العام الماضي لما وصلت ولدي المدرسة وكنا متأخرين لقيت مدرس واقف عند الباب ينطر الطلبة المتأخرين والمدرس كان صغير بالسن يمكن توه متخرج فنزلت مع ولدي علشان اعتذر عن التأخير واشرح له لأن التاخير ما كان ذنب ولدي فقلت له انا آسف استاذ انا اللي تسببت بتأخير ولدي تدرون شنو كان رد المدرس المربي الفاضل ! رد علي وهو يهز الخيزرانة بويهي يقول بس ترا هذي آخر مرة!!!! رديت عليه قلت انا اصغر أخو من اخواني أكبر منك بخمس سنوات ولولا احترامي لوظيفتك كمعلم كان خذيت الخيزرانة اللي بيدك ولسبتك فيها .... شفتوا شلون التربية ( كاد المعلم أن يكون رسولا).



ياريت المسئولين يسمعون الموضوع وياريت من وزيرة التربية ترفع موضوع جنطة الطالب في طابور الصباح هل تكون يمه أو لا ؟ الى مجلس الوزراء ومن مجلس الوزراء الى مجلس الأمة واذا مو ذاكرين الموضوع بالدستور يحول الى المحكمة الدستورية عشان بعد مايطلعون لنا نواب الاستجوابات ويسوون لنا فلم جنطة الطالب ويطالبون بطرح الثقة بوزيرة التربية، بعد موناقصين كافي اللي فينا ونوابنا على طريف.


هذي سالفتي اليوم وبانتظار نقدكم البناء


ملاحظة: على طاري منطقة مشرف منا الى مجلس ادارة جمعية مشرف التعاونية، البراحتين اللي سورتوهم على انه بتسوون حضانة وصالة أفراح انتو مسورينهم حق المجلس اللي عقبكم مثلا، وبعدين بتسوون صالة أفراح بالمساحة الصغيرة هذي خلف فرع 24 ساعة أحد قايلكم الكويتيين يسوون عروسهم حق 20 نفر بس عيب عليكم ترا أهل مشرف ناس واعين ما ينقص عليهم.


تحية الى بودعيج




وين أيام الجنسية الحمرا

أتحدى أي طرثوث لحق على هذي الوثائق
واذا كانت عنده أكيد قطها لما صار الغزو

دبي التي رأيت

مبارك عليكم الشهر، وتقبل الله طاعكتم



اليوم بقولكم عن سفرتي انا والعايلة الى دبي، أكيد راح تقولون شنو اليديد الكل فيكم شاف دبي لكن أرجو انكم تتحملوني الى النهاية، في أول شهر أغسطس كان موعد اجازتي السنوية وبما أن شهر رمضان الكريم يصادف في نفس الشهر قررت أسافر الى دبي منها تكون رحلة خفيفة واذا صادف رمضان وانا هناك ما أحس بفرق، وصلنا دبي وفي اليوم الآول قررنا نروح دبي مول عن طريق المترو طبعا المترو الحين شغال اللهم بعض المحطات وما شاء الله شفت هذا الانجاز الأكثر من رائع، وصلنا محطة برج خليفة واخذنا تكسي الى دبي مول ( على فكرة ترا تقدرون تروحون المول من المحطة مشي بس اذا كنتوا نفس حالتي ومعاكم يهال التكسي أفضل) المهم دخلنا هذا المول العجيب واللي يحسسك انك في أوروبا المهم مابي اقول لكم عن المحلات بس بتكلم عن أماكن التسلية الموجودة هناك، أول شي بالنسبة حق اليهال الصغار ما تحتاج عربانة لأنهم يأجرون سيارات صغيرة حق اليهال أدري بتقولون موجود عندنا بالكويت لا ماعندنا مثلهم لان السيارة مجهزة بشاشه صغيرة تعرض أفلام كرتونية يعني ماتشوف اليهال راكبين السيارة ويصارخون أو يبكون او واقفين ملوا من القعدة.

وأجارها 150 درهم اماراتي 50 ايجار و100 تأمين تستلمها لما ترجع السيارة ومدة التاجير غير محدده المهم ترجعها قبل لا يسكر المجمع ( يابلاش) عندنا بالكويت الاجار بالساعات وثلاث ارباع الوقت الياهل يمشي ونحط اغراضنا فيها، المهم قررنا ندخل الأكواريوم طبعا كحجم أصغر من المركز العلمي عندنا لكن بالمحتويات لا يقارن شوفوا الصورة





لا تعليق طبعا

المهم في المول عيالي دخلوا كيدزانيا وهو عبارة عن مكان خاص بالعيال اللي أعمارهم من 3 الى 17 سنة وفيه يقدرون يمارسون أي وظيفة تناسب ميولهم والمكان عبارة عن مدينة صغيرة يعني المكان عجيب، للأسف ماعندي صور حاليا لكن خلال فترة دخول عيالكم واللي تاخذ مده ممكن توصل 4 ساعات واذا مالكم خلق تدخلون معاهم تقدرون تنتظرونهم في ردهة المطاعم أو اذا كان الجو حلو ممكن تقعدون في الساحة الخارجية يم برج خليفة ومقابل النافورة الراقصة مثل نافورتنا اللي يم الاسكيتنج منتوا مصدقين شوفوا الفلم


واليوم اللي بعده رحنا برج خليفة اللي اعجوبة من عجائب الدنيا وأطول برج في العالم، طبعا أعجز عن الوصف لكن اتركم مع بعض الصور.




في قاموس القادة لامكان لكلمة " مستحيل "

ومهما كبرت التحديات، فإن قوة الإيمان والعزيمة والمثابرة كفيلة بالتغلب عليها

- صاحب السمو الشيخ محمد بن راشد آل مكتوم





هذا جزء من صورة كبيرة موجودة لما طلعنا من البرج الاشخاص الموجودين بالصورة اهم فريق العمل في برج خليفة من النجار والفني الى مدير المشروع على فكرة الصورة مو مرتبة يعني ممكن الفني قبل المدير

طبعا خلال هذه الجولة ما شفت ( قرطاس ) على الأرض نظافه في كل الأماكن اللي زرتها حتى العمال اللي يقومون بتنظيف انظاف وأنيقين ويقومون بشغلهم بضمير مو مثل البنغالية اللي عندنا تشم ريحته قبل ماتشوفه وما ينظف الا لما يمك علشان يسلم عليك وتعطيه المقسوم وبعدين يروح عنك، قمت اتساءل ليش كل هذه الأشياء موموجودة عندنا بالكويت، انا ما أحسد أهل الامارات والله لا يغير عليهم، واحنا نفتخر انه عندهم مثل هذه الانجازات، لكن الواحد يحس بالغيرة خصوصا لما نكون احنا كنا السباقين في مثل هذه الانجازات وكان يضرب فينا المثل بالاضافة انه اغلب الاستثمارات هناك نشوفها بأسماء كويتية، شي آخر لفت نظري وهو النظام والالتزام في القوانين، والقانون مايعرف الواسطة، على فكرة وانا واقف عند الجوازات لما وصلنا بالمطار لاحظت وجود كامره ورى الموظف اللي عرفته انها لمراقبة القادمين والموظفين في نفس الوقت يعني ماكوا مجال أحد يخطر دورك حتى لوكان يعرف أحد من الموظفين، طبعا قعدت اسولف مع واحد من الاخوان الاماراتيين، قال لي بصراحة انتوا الكويتيين محد مضيعكم الا ( ميلس الأمة ) مالكم، قعدت أفكر بكلامه واقارن احنا للأسف مجلسنا بعض النواب فاهمين الديموقراطية أو متعمدين يفهمونها غلط وقفوا الكثير من المشاريع التنموية لأنهم مايستفيدون منها وياخرون الكثير من القرارات اللي تنفعنا كمواطنين وبس فالحين يالاستجوابات اللي مامنها فايده، صح احنا في السبعينات في فترة حكم الشيخ صباح السالم رحمة الله عليه، كان المجلس منحل حل غير دستوري وقتها يمكن تذكرون شلون كانت الكويت في هذه الفترة كان جميع دول الخليج تنتظر العيد الوطني علشان تشوف الكويت اشلون تحتفل أو تنتظر لما الكويت تنظم حدث معين عشان يشوفون شنو راح تسوي الكويت من فناتك مثل مايقولون، حتى في عهد فترة الثمانينات بوجود المجلس لما كانوا أعضاءه ناس عيونهم متروسة ومهما صارت الاختلافات بينهم مصلحة الكويت فوق الكل عندهم، لكن مجلسنا في الفترة الاخيرة والاشكال اللي دخلوا المجلس لينالوا مصلحتهم الشخصية هذا اللي خلانا نتراجع بعد ما كنا في المقدمة، يعني هل هناك شك بأنه الكويت ماتقدر تبني برج مثل برج خليفة ؟ برج خليفة ابتدأ فيه البنيان مع بداية الشغل في نفق دوار الجوازات عندنا وانتهى بعده بسنتين ليش؟ لما شارع ونفق ياخذ كل هذا الوقت وين الخلل بوق ؟ البوق موجود بكل مكان، لما استاد جابر ياخذ كل هذا الوقت في البنيان وبعدين تطلع لنا أخطاء كثر شعر الراس والى يومنا هذا ما صار فيه اي مباراة وفي المقابل ونفس المقاول اللي بنى استاد جابر يبني ملاعب بطولة كأس العالم بجنوب أفريقيا ويسلكها خلال ثلاث سنوات ما نتساءل ليش ؟



انا أقول لكم أنه الكويت تقدر تبني برج مثل برج خليفة، والدليل شوفوا المباني قبل مثل المدارس قبل والمدارس الحين، اما من ناحية المباني وهل تشكون انه الكويت ماتقدر تقدم ملف لتنظيم كأس العالم مثل قطر الشقيقة؟ أيام الشهيد فهد الأحمد أقولها بكل ثقة كان رئيس الاتحاد الدولي هافيلانج مايشك خيط بإبره الا لما يرجع حق الشهيد فهد الأحمد، واسرائيل محد طرها الا الشهيد رحمة الله عليه، والحين بالرياضة كل من يطقنا من الاتحاد الدولي الى بن ....همام هذا اللي ماكان يتجرأ يبطل حلجه أمام الشهيد كل هذه الذكريات والافكار واشياء ثانية سرحت فيها لما كنت اتكلم مع أخوي المواطن الاماراتي الطريف في الأمر كنا قاعدين نشوف مباراة منتخب الكويت الأولمبي ومنتخب الامارات النهائية في كأس الخليج لتحت 23 سنة اللي نظمتها قطر وصحيت على صوت المعلق الاماراتي وهو يقول احنا قاعدين نلعب مع منتخب الكويت ملوك الكرة الخليجية نلعب مع دليل العرب لكأس العالم، شفتوا شلون ينظرون لنا، فعلا لما الواحد يتذكر حالنا قبل ويشوف حالنا الحيل بوجود نواب الطراثيث يعوره قلبه.


هذي كانت سالفتي خليتها بلا نهاية والتعليق لكم


أمنية : بمناسبة شهر الرمضان الكريم، أتمنى اشوف القرقيعان السنة مثل أيامنا قبل اليهال يدورون بالفرجان ويغنون سلم ولدهم ، والبنات قرقيعان وقرقيعان وكل واحد معلق كيسه برقبته، وايد أحسن من توزيع القرقيعان بعلب وكل عايلة بيوم الزواره يسوون قرقيعان عائلي، والله ولهت على (ويص ويص في بيتكم ...............)

حكاية معاملة

حدث في ديوان الخدمة المدنية


          سالفتنا اليوم صارت في ديوان الخدمة المدنية، طبعا احنا الان نعيش عصر التكنولوجيا والحكومة الالكترونية يعني عصر السرعة وتوفير الوقت، أتركم مع القصة وأرجو انكم توسعون صدوركم معاي:

تبدأ القصة بإحدى الموظفات الحاصلة على إجازة دراسية، حسب ماهو معروف الاجازة الدراسية مدتها 4 سنوات موظفتنا درست الاربع سنوات في كلية التربية بالكويت، كانت منتظمة في تقديم التقارير والنتايج الى ديوان الخدمة أول بأول عند نهاية كل فصل دراسي حسب ما طلبوا منها الديوان، ونتيجة تغيير بعض القوانين بالكلية عموما وفي تخصصها اضطرت انها تتأخر كورس واحد، يعني بدل ما تتخرج الفصل الدراسي الثاني من عام 2009/2010 راح تتخرج الفصل الدراسي الأول من العام 2010/2011 وارجو منكم ملاحظة التواريخ بعد السؤال قالوا لها في ديوان الخدمة ماكو مشكلة بس تقدمين كتاب طلب تمديد المده وراح يتوافق عليه لأن التمديد مجرد فصل دراسي واحد، وهني تبدأ المعاناة، في نهاية شهر مارس 2010 راحت الى ديوان وقدمت كتاب طلب التمديد، وبما أنها موظفة حاصلة على تقدير امتياز اثناء فترة عملها قامت الوزارة وبعثت كتاب ثاني تطلب فيه من الديوان السماح للموظفة بتمديد المدة كنوع من تعزيز الطلب اللي قدمته الموظفة وتشجيع وتقدير لموظفتهم، المهم الموظف المختص بالديوان استلم الكتاب من الموظفة وطمنها وقال لها انهم بعد ما تتم الموافقة على التمديد راح يبلغون الوزارة اللي تشتغل فيها ولو حصل اي عرقلة للطلب راح نتصل عليك، وطلعت الموظفة وهي مطمئنة، ليه هني وما في أي مشكلة وكله تمام.

في يوم الخميس الماضي 17 يونيو 2010 ، ياها اتصال من مقر عملها يسألونها شنو صار بالكتاب ردت عليهم قالت ان الديوان بخاطبهم من شهر مارس، ردت عليها الموظفة وقالت لها انه الديوان ماخاطبنا ولا بعث اي كتاب وانه عندها الى نهاية شهر يونيو والا راح يحسب لها انقطاع عن العمل ويتوقف راتبها، راحت الموظفة الى ديوان الخدمة بعد مو وقته يوقفون المعاش ومثلكم عارف وزاراتنا بسرعة يوقفون المعاش بس تتطلع روح الواحد علشان يرده، المهم وصلت الديوان وبسؤال الموظف المختص قالها بكل برود كتابك موقف بس السبب مو معروف وبما انه الوقت كان يوم الخميس والساعة كانت 11 معنى هذا الوقت متأخر فالموظف اللي عنده الموضوع غير موجود فأفضل تراجع يوم الأحد .

وفي يوم الأحد 20 يونيو 2010 الساعة 9 صباحا كانت الموظفة واقفة في منطقة الشويخ في ديوان الخدمة المدنية بالدور السابع في ادارة البعثات والاجازات الدراسية عند مكتب السيد /؟؟؟؟؟؟؟؟؟؟؟؟ ( الاسم موجود لدينا ) وبعد سؤالها له عن سبب ايقاف كتاب التمديد وبعد البحث والتحري قالها انهم يبون شهادة الفصل الصيفي من عام 2008/2009 وشهادة الفصل الدراسي الحالي من هذه السنة، وسهالات ان شاء الله راح تمشي الاجراءات، طلعت الموظفة مسرعة وراحت كليتها كلية التربية الأساسية في منطقة الشامية وطلعت الأوراق المطلوبة ورجعت بسرعة الديوان، في الساعة 10 ونص كانت عند مكتب الأخ اللي طلب منها الاوراق وطبعا المكتب كان فاضي سألت احد الموظفات قالت لها سألي المكتب اللي يمي والمكتب اللي يمها دزوها على المكتب اللي يمهم، عرفت انه ماكو فايدة وحبت تدوره بروحها شافت كاونتر سألتهم عنه قاموا يتصلون فعرفوا انه تحت في صالة المراجعين نزلت موظفتنا الى الصاله وسلمته الاوراق كان يقولها خل نصعد فوق علشان يطبعون الكتاب ارجعوا الى كاونتر السكرتارية وقالها الموظف انتظريني دقايق على ما يطبعون الكتاب وغاب وهذا وجه الضيف البنت ماهي عارفه وين تروح وظلت منتظره من الساعة 11 الى 11 ونص واقفة لأنه مافي كراسي وكأنها معاقبه، وبعدها سألت عن الأخ اللي قالها نطريني تفاجات انه الحبيب راح مكتبه عن طريق الممر الثاني ولما سألته عن كتابها قالها رجعي نفس المكان عند فلان قاعد يطبعون الكتاب هناك رجعت هناك وتتذمر من طول الوقت أخيرا حسوا الاخوان على دمهم وعطوها كرسي تقعد طبعا لما قعدت بدت تشوف القسم اللي يطبعون كتابها فيه القسم  مكون من 10 بنات كويتيات تقريبا وموظفين مصريين اثنين البنات سوالف وضحك وتبادل وصفات للأكلات ( يعني في 2010 والسوالف هذي قديمة بس ماكو فايدة) اما الشغل فهو على المساكين الاثنين وبعدين الموظفين الكويتيين يحتجون ويقولون ليش المسئولين مايثقون فينا ويفضلون علينا الغرب المهم اثناء ما اهي قاعدة دخل احد المراجعين وطلب تصوير ورقة عنده تصوروا انه الموظفة استغرقت 10 دقايق في تصوير الورقة ( ودي اعرف نوع مكينة التصوير اللي عندهم ومن اي قرن ) المهم في تمام الساعة 12 الظهر تم طباعة الكتاب وخذته بايدها ورجعت للموظف على شان يوقعه وقام الموظف ورجعه على الطباع لأنه في خطأ وتم تعديل الخطأ ورجعت مرة ثاني ووقعه وبعدين راحت حق المراقب السيدة/؟؟؟؟؟؟ ( عندي اسمها ) وبعد ما شافت الكتاب ردته الى الطباعة لوجود خطأ ثاني لأنهم ما لازم يكتبون جملة (بالنظر الى الأسباب) فرجعت الموظفه الى الطباعة وطبعوا الكتاب وراحت حق الموظف يوقعه وبعدين الى المراقب وبعدين راحت الى مكتب الوكيل طبعا هني في ملاحظة خلال جولة الموظفه بين الاقسام التكييف كان مسكر لترشيد الكهرباء ماعدا مكيف الوكيل، المهم وقع الوكيل الكتاب وراحت الموظفة الى السكرتارية علشان يسوون المسح الضوئي ونزلت الصادر وهني قالوا لها خلاص احنا نبعثه الى مقر عملك ردت عليهم قالت انا ابي اخذه بايدي واوديه ولاما كان نطرت طول هالمدة كان يقولها مراقب الصادر رجعي فوق الى المراقبة خل تعطيك ورقة لا مانع من تسليم الكتاب رجعت الموظفة مره ثانية وخذت ورقة من المراقبة واستلمت كتابها في تمام الساعة 2 الظهر، وطلعت من الديوان وهي منبهرة بالتكنولوجيا وسرعة والوفاء في العمل، وراح توديه مقر عملها يوم الاثنين 21 يونيو 2010 لأنها ما قدرت توديه بنفس اليوم لأنه دوامهم خلص .



انتهت سالفتي بس قبل لا أودعكم عندي شغلة صغيرة غلام فراش بنغالي يشتغل معانا قبل اسبوع زوجته ولدت استخدم الكمبيوتر اللي عندي بالمكتب ودخل بياناته وبيانات ولده اليديد واليوم وصلوا المستندات الرسمية الخاصة بالمولود اليديد من شهادة ميلاد وجواز سفر وتحديث البطاقة عن طريق البريد المستعجل DHL حدث هذا في بنغلاديش

والتعليق لكم

الشيخ باسل صباح السالم الصباح ......إلى رحمة الله

بسم الله الرحمن الرحيم
"يا ايتها النفس المطمئنه ارجعي الي ربك راضية مرضية فادخلي في عبادي وادخلي جنتي"
                                                                                                                             صدق الله العظيم