صار لي تقريبا شهور ما كتبت اي مقال والسبب اني مليت لان مهما نكتب ومهما نتكلم فلا حياة لمن تنادي بالاضافة الى وجود برامج مواقع التواصل الاجتماعي واللي اغلب الناس اتجهت لها وانشغالي في وظيفتي وحياتي الخاصة حالي حال أي مواطن كويتي، لكن طلعت على الساحة مؤخرا سالفة المواطن الاخ أحمد ارشيد هذا المواطن اللي قلب الشارع الكويتي عقب ما تكلم وأعلن بجدية بانه راح يسقط القروض عن كل الكويتيين.
- من هو أحمد ارشيد ؟
- اشلون راح يسقط القروض؟
- من وين له الفلوس اللي تسكر كل هذه الديون؟
- شنو مصدرها ؟ هل غسيل أموال ؟ او مصدرها سليم؟
- منو وراه ويدعمه؟ هل رجل اعمال كبير ؟ ام شيخ؟ او بنك معين؟
- هل فكرته قانونية؟
- شنو راح يستفيد من ورا هالحملة؟
- هل هناك هدف سياسي ؟ هل راح يرشح لمجلس الامة؟
- ما مدى جدية حملته؟
هذه اسئلة قليلة من الاسئلة اللي اسألوها المواطنين من بداية الاعلان عن الحملة.
انا ما اعرف الاخ أحمد ولا تربطني فيه اي صلة ولكني التقيت فيه في احد الندوات مره واحدة، في البداية ما كنت مقتنع وكنت أقول اشلون مواطن عادي حاله من حالنا بيسكر القروض؟
كلنا متفقين انه قضية القروض تعبتنا واهلكتنا وكسرت ظهورنا بعد، وصارت مثل الحفرة كل ما نحاول نطلع منها نغوص داخلها الى ان وصلنا القاع ووصلت السكين للعظم.
واللي يوصل للمرحلة اللي وصلناها ويشوف الظروف والاحداث حوالينا من مطالبات من المواطنين لاسقاط القروض واعتصامات ومناشدات حتى وصل الامر لمناشدة اهل الخير في دول مجلس التعاون، حتى صار المواطن مثل الغرقان اللي يتعلق باي قشه، ويدور اي حل عشان يشيل هذا الحمل من ظهره، فيستغل بعض النواب ممن ترشحوا لعضوية مجلس هذه القضية لدغدغة المشاعر وكنا نسمع الوعود اثناء التحضير للانتخابات بان تكون قضية القروض اهي القضية الابرز على طاولة النقاشات تحت قبة البرلمان لكن مسرع ما تتلاشى هذي الوعود عند انعقاد اول جلسة فهذا اللي خذاه المواطن من هؤلاء النواب واعيد واقول البعض وليس الكل، ومن جهة تطلع لنا الحكومة وتقول انها ما تقدر تسدد القروض لانها تاثر على الميزانية من الاخر يعني ماكو فلوس لكن بالمقابل نشوفها تقرض وتستثمر وتساعد وتتبرع لدول ثانية وغير قضايا الفساد اللي طلعت لنا.
المهم مالكم بالطويلة، هذا الكلام كلنا نعرفه ومهما نتكلم فيه ما نخلص، نرجع حق مبادرة الاخ أحمد ومثل ما قلت لكم ما كنت مقتنع بمبادرته بل وشكيت فيه نواياه بيني وبين نفسي، لكن عشان اقطع الشك باليقين قررت اني التقي فيه واعرف كل شي، التقيت بصديق وجارعزيز لي في مدينة صباح الاحمد وفتح لي موضوع الحملة فسالته وكان يجاوبني بديت اقتنع بكلامه لثقتي فيه، ولكن كان في قلبي بعض الشك خصوصا ما اسمعه خلال الفترة من ناس والبعض منهم قانونيين من يقول انه الحملة مخالفة للقانون ويحذرون المواطنين من الوقوع في الفخ وانها محاولة نصب كبيرة وانا متحير مره اقول اقدم أوراقي ومره اتردد افكر في بيتي وعيالي ابي اوفر لهم عيشة كريمة لكن في ظل الظروف والراتب يتنتف بالاقساط اللي كسرت ظهري ما اقدر، الى ان سمعت انه الحملة افتتحت مقر فرع لها في المدينة فعزمت اتواجد وفعلا رحت وقابلت الاخ أحمد واستمعت له والى طريقة الالية اللي راح تسويها الحملة في سداد القروض كلام اقنعني وقضى على حبتين الشك اللي في قلبي.
الرجل اجاب على كل الاسئلة واهمها من وين مصدر الفلوس اللي بتسددون فيها القرض؟ قال الفلوس مصدرها فاعل خير راح تعرفونه في وقت السداد.
هل مصدر الفلوس قانوني وسليمة؟ اجاب نعم الفلوس قانونية وسليمة والدليل انها موجودة بحساب احد البنوك او بعدة حسابات في اكثر من بنك داخل الكويت.
هل هناك استفادة مادية لكم يا احمد من وراء السداد؟ قال الهدف الاساسي عمل خيري ولكن نعم في، فهي تعتبر صفقة تجارية.
بالنسبة لي شخصيا وكمواطن غرقان بالقروض واهلكتني الاقساط اسمحوا لي اقول رايي الشخصي انا ما يهمني من وين هذي الفلوس وشنو مصدرها وهل هي حلال ام حرام هل مصدرها غسيل اموال او تبرعات خيرية او …او…او… كل هذا ما يهمني كثر انه قرضي يطيحروارتاح أما بقية الامور فهي على ذمة الشخص اللي يابها، ولا يهمني ان كان يربح وكم يربح وعساه يربح اضعاف أضعاف اللي دفعه لسداد القروض يستاهل لأن شال حمل كبير وفرج على الكويتيين، ولا يهمني اشلون بيربح ولا شنو تفاصيل الصفقة انا كل اللي يهمني انه قرضي يطيح.
الطريقة اللي قال عنها الاخ أحمد اهي كالتالي :
يقوم بسداد قرضك وتاخذ براءة ذمه من بنكك ويطالبك بثلث المبلغ اللي سدده لك بقسط شهري ١٠٠ دينار كويتي
مثال : قرضك ١٠٠ ألف دينار يسدده لك وتقوم تسدد له ثلث المبلغ وهو ٣٣ ألف تقريبا بقسط ١٠٠ دينار شهريا وكل هذي العملية تكون عن طريق البنك والتحويل بين الحسابات يعني ما في مجال للتلاعب .
والمطلوب حاليا للتقدم الى الحملة ورقتين صورة عن البطاقة المدنية وشهادة بالمديونية تحطهم بظرف وتكتب عليه اسمك ورقم التلفون واسم البنك وتقدمه لهم الى الان انت غير ملزم معهم بشي ولا يقدرون يلزمونك بشي يعني الى الان الوضع تمام.
وتبقى خطوة وحدة واللي بناءً عليها تتخذ قرارك بالموافقة آو الرفض وهي عند توقيع عقد اقرار المديونية مع اللي سدد قرضك وفي هذه المرحلة لك مهلة أسبوع تاخذ العقد وتقراه وتوديه لاشخاص قانونيين تثق فيهم ويقولون رايهم اذا كانت الامور طيبة فتوكل على الله ووقع العقد ويطيح قرضك مع البنك واما اذا كان هناك بعض الملاحظات أو بعض النبنود المريبة، خلاص لا توقع واصرف النظر.
هذي الخلاصة لآلية واذا تبي تفاصيل وعندك اسئلة روح بنفسك واسمع الاجابات باذنك ولا تعتمد على فلان قال وفلان يقول ولا على وكالة يقولون، لأن بالنهاية القرار قرارك انت بروحك.
الحين عندي چم سؤال ماني لاقي لهم اجابة :
اذا كان اللي يقوم فيه الاخ احمد مخالف للقانون او انه بينصب على الناس كما قال البعض.
ليش ساكتين عنه ياحكومة ليش ما في تحرك من الجهات المعنية في تطبيق القانون عليه؟ ليش كل مره يتم استدعاءه الى النيابة يخلى سبيله ويكمل رسالته وحملته؟
على الأقل ليش ما يطلع بيان رسمي من قبل البنك المركزي ويحث المواطنين على عدم التعامل معاه؟
شنو ناطرين؟ لما يتورطون العالم؟ منو هالمواطنين؟ مو عيال الكويت مو عيالكم مو من مهامكم يا حكومة الدفاع عنهم وحمايتهم والمحافظةعلى حقوقهم؟ اذا كان الأمر في عملية نصب وصار فانتم مشاركين في الجريمة بسكوتكم
اما اذا كان شغلة قانوني وسليم ونيته صافية ويبي الخير لأهل ديرته ليش ما تدعمونه معنويا على الاقل قدموا له التسهيلات الرجل يبي يسوي خير في اهله ليش ما تساعدونه على فعل الخير ليش تحاربونه ما تبون الخير حق عيالكم؟ ترا اللي ما فيه خير لاهله ما فيه خير للناس.
وفي النهاية اسأل الله تعالى ان كان عبدك أحمد ارشيد صادقًا في نواياه وفيما يفعله ان توفقه وتعينه وتزيده من القوه ليقف في وجه من يحاربه وتنصره عليهم.
وان كان غير ذلك اسالك ان تهديه وتبعده عن اهل الكويت
هذي سالفتي اليوم وسامحوني اني طولت عليكم
ليست هناك تعليقات:
إرسال تعليق