bravenet

الخميس، 22 مايو، 2014

تعبنا والله العظيم تعبنا

مادري من وين أبدأ؟
ولا اشلون أبدأ؟
ولا عن شنو أكتب؟
أصلا ما كنت ناوي أكتب بالأساس، أخر شي كتبته من عشر شهور تقريبا، ومن يومها ما طليت حتى بالمدونة، انزين ليش ماكتبت؟
لأني وصلت الى مرحلة من اليأس ما يعلم فيها الا الله سبحانه وتعالى، وقبل شوي حسيت اني لازم أكتب شي لازم أقول شي، بس شنو؟ ماأدري....
المهم الحين انا جدام اللاب توب وقررت انه اللي ببالي راح أكتبه مادري هل راح يكون كلام مفهوم؟ مومفهوم؟ منطقي؟ مومنطقي؟ حتى اذا كان هناك أخطاء إملائية بخليها.

The Godfather ( العراب) من أحب الافلام عندي سواء قصة أوتصوير أوإخراج أوموسيقى تصويرية، على كثر ما شفت أجزاءه الثلاثة ما مليت منه، طبعا الفلم يتكلم عن عصابات المافيا وعن احدى العائلات، كان يعجبني لما يورينا اشلون عوائل المافيا ملتزمة في علاقتها مع بعض مافي أي نوع من أنواع الخيانة حتى في خلافاتها، المهم ماعلينا سوالف أفلام بس خلوني اتكلم عن المافيا وانا بصراحة لجأت للعم google  عشان الوقت لقيت:
(المافيا هو مصطلح يستخدم لوصف نوع من «نقابة عصابات الجريمة المنظمة» التي تمارس الحماية بالابتزاز في المقام الأول واستخدام الترهيب العنيف للتلاعب بالنشاط الاقتصادي المحلي، وبخاصة الاتجار غير المشروع. ويمكن أن تمارس أنشطة ثانوية مثل الاتجار بالمخدرات والقروض بفوائد مرتفعة و التزوير. ترتبط عصابات بميثاق شرف، ولا سيما ميثاق الصمت (أو omertà في جنوب إيطاليا )، يحمي المافيا من التسللات الخارجية و تدابير إنفاذ القانون.
في البداية التصق المصطلح بالمافيا الصقلية، ولكن التسمية ما فتئت أن شملت غيرها من الأساليب و المنظمات المماثلة، مثل " المافيا الروسية " أو " المافيا اليابانية ". وتستعمل هذا المصطلح، بشكل غير رسمي، الصحافة و الجمهور.)
هذا كان تعريف المافيا لكن قبل ما أعلق لاحظتوا اني حطيت بعض الكلام باللون ثاني، أول شي عجبني وصف (نقابة عصابات) كأن يقول نقابة العاملين بالوزارة الفلانية، الشغلة الثانية لاحظوا آخر كلمة صقلية، وقبل لا أكمل خل انشوف google  شنو يقول عن صقلية:
( في عام 652 فتح العرب صقلية، واستوطنوا بها ابتداء من عام 827 حينما قدم إليها جيش من الأغالبة وهم قادمين إليها من تونس، فعاشوا في منطقة مزارة. مع حلول العام 878 فتحت جزيرة صقلية بالكامل، وأصبح اللغة العربية لغتها الرسمية حتى منتصف القرن العاشر.)
ممكن استنتج انه هناك ايطاليين من سكان صقلية أصولهم عرب وبما أن المافيا تأسست هناك فلا يمنع أن يكون للعرب مساهمة في تأسيسها، ومن هم العرب احنا، طبعا هذا استنتاج ممكن يكون غلط.
المهم هذا كان أول من زمان، نيي للعصر اللي أحنا عايشين فيه وبالتحديد الكويت هل اللي قاعد يحصل الحين أو من بعد الغزو كمرحلة زمنية فيه أمثلة تشابه ما يفعله أعضاء المافيا؟
ماراح أجاوب، وراح اترك القارئ يجاوب، لما ناخذ الكلمتين اللي علمتهم باللون الأحمر (للتلاعب بالنشاط الاقتصادي المحلي)، (والقروض بفوائد مرتفعة) التلاعب بالنشاط الاقتصادي
س: هل عندنا تلاعب؟ ج: نعم
س: اذكر أمثلة على ذلك؟


مستشفى جابر المفروض جذي 


استاد جابر

مطار الكويت، محطة مشرف للمجاري، المصافي بالنفط، آخر مستشفى شيد بالكويت هو مستشفى الرازي سنة 1984 يعني قبل 30 سنة


المترو، شوارع الكويت وفضيحتها مع المطر، جامعة شدادية هذي قصة ثانية بعد التحرير سنة 1991 دخلت الجامعة وأثناء التسجيل كانوا يقولون لنا ترا الدولة بتبني جامعة بشدادية وراح ننتقل هناك قريبا
في أول محاضرة قالنا الدكتور: لما كنت طالب بجامعة الكويت بالسبعينات، قالوا لي ترا الدولة بتبني جامعة بشدادية.
هذي بعض الامثلة للتلاعب بالاقتصاد. تعال انت ذكرت مشاريع خدمات شكو الاقتصاد؟ مشاريع الخدمات مسكتها شركات عشان تبنيها والدولة قاعدة تدفع من المال العام وماكوا مشروع خلص.
انزين القروض بفوائد مرتفعة هل هذي مشكلة؟ 


محد طقك يالمواطن على ايدك وقال لك اخذ قرض يالشيطان، صح لكن حسب علمي انه القرض يخلص لكن قروض المواطن ماخلصت كل ما يقول الحين اسكر قرضي يلقى نفسه مكانك راوح ليش نتيجة الفوايد اللي شقت حظه، شنو الحل لكل هذي المشاكل ؟ ما لنا غير مجلس الأمة وفرساننا أعضاء مجلس الأمة اللي المفروض أنهم يحملون هموم الشعب اللي وصلهم الكراسي، اللي المفروض يدافعون عن المال العام للبلد للأسف نسوا بمجرد وصولهم، ولا حد يقول لي من تقصد؟ وانه موكل الأعضاء ولكن البعض، أدري انه فيه أعضاء ضميرهم حي ولكنهم اقلية، المهم أعضاء الأمة اللي الشعب وصلهم للمجلس وقفوا ضد الشعب، قضايا المواطنين أصبحت سلعة يلعبون فيها ايام الانتخابات لكسب اصواتهم.

* عطوني عضو مجلس الامةساكن بالايجار ويأخذ 150 دينار بدل ايجار وصار له 20 سنة ينطر بيت.
* عطوني عضو مجلس أمه عليه قرض وللحين ما سدده ومسجل في صندوق المتعثرين أو صندوق الاسرة.
* عطوني عضو مجلس أمه  قبل مايصير عضو كان ينطر دوره في ديوان الخدمه المدنية أو دعم العمالة من أجل الحصول على وظيفه.

 كل مايصير مجلس يطلعون لنا المرشحين ويأخذون المواطن بالكلام الحلو ووعود بحل القضايا بس خلال فترة الدعاية الانتخابية، كل واحد فيكم الحين قاعد يقرا خل يقول لي: اشكثر تلفوناتكم رنت سواء باتصال من مفاتيح انتخابية تتوسل لكم ان تنتخبون مرشحهم؟ أو كم مسج وصلكم من المرشحين تسلم وتصبح عليكم وتعتذر لعدم زيارتهم لكم خلال فترة الدعاية اللانتخابية؟ ولا المسج : (أخي العزيز أعتذر لعدم زيارتي لديوانك لضيق الوقت أخوك المرشح فلان الفلاني عن الدائرة ال..) ياشقول انت منو قالك انه عندي ديوان وانا ساكن بشقة ايجار.

هذوله الاعضاء من جهة والبنوك من جهة والشركات كما يسميهم الأخ محمد الملا تجار المال العام اللي تاخذ مناقصات لتنفيذ المشاريع من جهة.
لو قلنا الاعضاء = عائلة دون كورليوني
والبنوك = عائلة كابوني
والشركات = عائلة أنستازيا
شنو تصير المعادلة.
ومقابلهم الحكومة اللي تقط اللوم عليهم بتعطيل التنمية بالبلد وهم بالمقابل يقطون اللوم على الحكومة بعرقلة شغلهم.
في السابق الشعب الكويتي وصل اعضاء تسببوا بازمة بالبلد من مظاهرات، وووو الكل يذكر الاحداث، ولما الشعب حب يغير صار عندنا المثل ما أردى من المربوط الا المفتلت وماشفنا تغير شي.

شنو الحل؟
لاحد يعتقد انه الاجابة عندي بروحي، الاجابة عندنا احنا كلنا كشعب، لازم كلنا نسأل أنفسنا هذا السؤال وكل واحد فينا يجاوب عليه بضمير صادق ويحط بباله انه مصلة الكويت فوق كل شيئ.
شنو الحل؟ انا أقول الحل أولا نقاطع أعضاء مجلس الأمة جربنا سنين مع مجلس الامة وماحصلنا شي، خل نجرب 4 سنين من غير مجلس الأمة ليش لأ؟ ما فيها شي انا مواطن صارلي 20 سنة متزوج وولدي طولي توني ماخذ بيت والله أعلم هل راح أسكن فيه ولا لأ يصير ورث حق عيالي لان مادري المنطقة متى توصلها أبسط الخدمات وهي الماي والكهربا، لازلت أعاني من قرض أخذته نتيجة اني بعت بضاعة والشاري أعطاني شيكات من غير رصيد من سنة 2002 الى يومنا هذا ماخذيت حقي وين الاعضاء مادروا عني، وين الاعضاء اللي لجأت لهم لما تدخل زميلهم العضو في التعيينات وسحبوا ملفات التعيين اللي ملفي منهم وحطوا ربعه، انا مابي زيادة علاوة الاولاد ولا زيادة بدل الايجار لأن الزيادات تضرني ماتنفعني، وين أعضاء مجلس الأمة والمسؤولين في الحكومة لما ألجأ لهم في مشكلة زوجتي عشان أنقلها من وزارة الى اخرى تقعد 7 شهور من غير راتب وبالرغم من ذلك تداوم وتؤدي عملها ولكن الكل منهم يتفرج ولما اشتكي بالكثير يتعبون نفسهم ويقولون لي الله يعينك ( بعد قولوا لي الله يعطيك ) وقبل النقل حسب القوانين لازم تنتدب لمدة سنتين وخلال السنتين كل نهاية شهر لازم نراجع الوزارة عشان نذكرهم بالراتب، وينكم يالاعضاء عن كل اللي صار لي بالرغم اني ما خليت عضو مجلس أمه الا ورحت له وأول سؤال يسألني انت وين ساكن؟ يعني صايد الحركة يشوفني بدائرته ولا لأ، يستفيد مني ولا لأ، وين المسئولين اللي بالوزارة اللي اشتكيت لهم أهمال موظفينهم ووين وكيل الوزارة اللي دشيت مكتبه واشوفه مايبين من المعاملات المكدسة اللي تنتظر توقيعه وهو مسكين مايعرف يداوم يوم الخميس لازم يكون بالشاليه، انا اشوف الحل بان لا نعتمد على الاعضاء وان نقوم بمراقبة المسئولين مانبي منهم شي نبيهم يشتغلون بضمير فقط ياريت كشعب ننسى الخلافات بأنواعها طائفية أو عرقية خلونا نجرب، جربنا مع أعضاء مؤزمين واحد ماكان عاجبه رئيس الوزراء طلع مظاهرة والثاني سوا علمنا خرجة ورفع علم دولة ثانية والثالث يبي يموت بالمجلس صاير يوسف وهبي على المسرح، ودخلونا بسوالف بدو حضر شيعه سنة، ولما راحوا يونا اللي عقبهم ما شفنا منهم غير الكلام ودخلونا بالطوفة بقانون صندوق الاسرة وبلشوا الحكومة، خلونا نقول يمكن اللي قبلهم على حق، خل تكون كلمتنا وحدة نكون قلب واحد مثل ما كنا بالغزو ولو اني ماحبيت التشبيه، خل نتذكر كمواطنين انه عضو مجلس الامه اهو بحاجة لنا مو أحنا بحاجة له، تذكروا أن أجدادنا من أكثر من 300 سنة بنوا هالأرض وبايعوا الصباح حكام عليهم ماكان فيه مجلس وقتها ولا كان في دستور وقتها، ولكن كانت في بيعه وعهد بالكلمة بيعة الصباح والعهد من اللأثنين بالمحافظة على الكويت، خلونا نحافظ على كلمة أجدادنا، لاتسمحون لأي شخص مهما كان أن يندس بيننا ويثير الفتن، وانا بالرغم من كل هذا اللي صارلي، ما راح ينقص ذرة حبي وولائي للكويت وحبي لشعبها وحكامها اللي أهم أهلي.
حفظ الله الكويت وشعبها من كل مكروه
 وأخر كلامي :
بلادي وإن جارت عليّ عزيزة وأهلي وإن ضنّوا عليّ كرام
فإنما رجل الدنيا وواحدها من لا يعوّل في الدنيا على أحد
عليك ببر الوالدين كليهما وبر ذوي القربى وبر الأباعد
كم وحدة هى خير من مصاحبةٍ يُنسى الجميع ويغدو الفذُّ مذكورا
والحكيم الرشيد يخجله العتب ولا يخجل اللئيـم سبابه
وما نيل المطالب بالتمنّي ولكن تُؤخذ الدنيا غلابا
ولا خير في حسن الجسوم وطولها إذا لم يزن حسن الجسوم عقولا
وللكف عن شتم اللئيم تكرّما أضرّ له من شتمه حين يشتم
ومن العداوة ما ينالك نفعه ومن الصداقة ما يضرّ ويؤلم
ومن لم يصانع في أمور كثيرة يضرّس بأنياب ويوطأ بمنسم
ومهما تكن عند امرئ من خليقة وإن خالها تخفى على الناس تعلم
كونوا جميعا يا بنيّ إذا اعترى خطب ولا تتفرقوا آحادا
تأبى الرياح إذا اجتمعن تكسراً وإذا افترقن تكسرت أفرادا
فالسر عندي في بيت له غلف ضاعت مفاتيحه والباب مختوم
وزن الكلام إذا نطقت بمجلس فإذا استوى فهناك حلمك راجح
إذا رأيت نيوب الليث بارزةً فلا تظنّنَّ أن الليث يبتسمُ
تكثّر من الإخوان ما استطعت فانهم عماد إذا استنجدتهم وظهير
وإذا لم يكن من الموت بد فمن العجز أن تموت جبانا
إذا أنت لم تزرع وأبصرت حاصداً ندمت على التفريط في زمن البذر
هى الأمور كما شاهدتها دول من سرّه زمن ساءته أزمان
فارفع لنفسك بعد موتك ذكرها فالذكر للإنسان عمر ثانٍ
ولا يألف الإنسان إلاّ نظيره وكل امرئٍ يصبو إلى من يشاكله
لا تحقرن صغيراً في مخاصمةٍ إنّ البعوضة تدمي مقلة الأسد
ضاقت فلما استحكمت حلقاتها فرجت وكنت أظنها لا تفرج
إن الأمور إذا التوت وتعقدت جاء القضاء من المليك فحلّها
كل يوم يمر يأخذ بعضي يورث القلب حسرة ثم يمضي
وعين الرضا عن كل عيب كليلة ولكن عين السخط تبدي المساويا
ثبتت على حفظ العهود قلوبنا إنّ الوفاء سجيـة الأحرار
وإذا العناية لاحظتك عيونها نم فالمخاوف كلهنّ أمان
وإذا كانت النفوس كبارا تعبت في مرادها الأجسام
نعيب زماننا و العيب فينا وما لزماننا عيب سوانا
إذا المرء لم يعتق من المال نفسه تملّكه المال الذي هو مالكه
إن الدراهم كالمراهم تجبر العظم الكسيرا
وإذا رأيت صعوبة في مطلب فاحمل صعوبته على الدينار
عن المرء لا تسأل وسل عن قرينه فكل قرين بالمقارن يقتدي
لأستسهلنّ الصعب أو أدرك المنى فما انقادت الآمال إلاّ لصابر
ما بين غمضة عين و انتباهتها يغيّر الله من حال إلى حال
ما حك جلدك مثل ظفرك فتولّ أنت جميع أمرك
لا تحسبن المجد تمراً أنت آكله لن تبلغ المجد حتى تلعق الصبرا
والهجرُ أقتلُ لي ممّا أراقبهُ أنا الغريق فما خوفي من البلل
إذا أنت أكرمت الكريم ملكته وإنْ أنت أكرمت اللئيم تمردا
لي حيلة فيمن ينمّم وليس في الكذاب حيلة
إنّ في الحكمة البليغة للروح غذاءً كالطبِّ للأجساد
ِفاطلبِ العزّ في لظى ودعْ الذلّ ولو كان في جنان الخلود
لكل شئ إذا ما تم نقصان فلا يغر بطيب العيش إنسان
من يفعل الخير لا يعدم جوازيه لا يذهب العرف بين الله والناس
بقدر الصعود يكون الهبوط فإياك و الرتب العالية
ما كل أصفر دينار لصفرته صفر العقارب أرداها وأنكرها
ما مضى فات والمؤمل غيب ولك الساعة التي أنت فيها
حكم المنية في البرية جار ما هذه الدنيا بدار قرار

واللي على راسه بطحه .......