bravenet

الاثنين، 11 أكتوبر، 2010

كل عام دراسي وانتوا بخير


انا قايل اني ما راح اكتب الا مع بداية السنة الجديدة لأسباب خاصة، ماعلينا المهم سالفتي اليوم عن شغلة حصلت يوم الخميس الموافق 7 اكتوبر في (معتقل) ثانوية صالح شهاب في منطقة مشرف، والله العظيم اني احب هالمدرسة وتكلمت عنها من خلال ناظر المدرسة السابق الاستاذ/ سلمان الشطي الله يطول بعمره، لكن اللي يحصل بصراحة لا يقبله المنطق، في طابور الصباح يوم الخميس كل الطلبة وقفوا عادي ولأن الشنط المدرسية تعيقهم أثناء القيام بأنشطة الطابور المعتادة مثل تمارين الصباح وتحية العلم ........الخ قاموا بعض الطلبة واسندوا شنطهم على الحائط خلفهم المصيبة انه المدرسين قفلوا من هذي الحركة واصروا انه كل طالب يخلي جنطته يمه (حشى مو طلبة عمالة آسوية بسافرون وبفتشونهم ) فقاموا المدرسين مشكورين شالوا كل الجناط وودوهم بمكان غير معلوم في المدرسة (شوفوا العقاب الحديث) وبعد ما انتهى الطابور الطلبة يسألون عن جناطهم بيحضرون الحصة، مدرس قالهم عند التربية البدنية راحوا التربية البدنية المدرس هناك قالهم ماكوا راحوا الادارة عمك أصمخ يدورون الجناط ويحاتون الحصة اللي بدت، يقولهم المدرس ردوا التربية البدنية يرجعون هناك يقولهم المدرس ماكوا جناط أصلا اليوم انتوا غياب ياسلام يعني أعاقب الطالب بالأسلوب هذا ومومهم تحصيله العلمي المهم يحسب غياب وكأن مدارس التربية مافيها الا مشكلة الجنطة لازم تكون يم الطالب بالطابور، ورجعوا الى الادارة والحمدلله كان في ولي أمر موجود وقته فالناظر أظهر كل صفات العطف والأبوة وطلب من مدرس التربية البدنية يعطيهم الجناط (الله يجزاك خير ياولي الأمر انك كنت موجود) ومدرس التربية البدنية طلع حاذف الجناط مادري بأي جناح بطريقة فوضوية خلونا من الكتب اللي في الجناط، ما فكرت يامربي يافاضل انه احتمال يكون طالب من اصحاب الجناط اللي رميتهم يكون مريض مثلا بمرض حساسية أو ربو ودواه حاطه معاه بالجنطة ؟ وبحذفتك هذي كسرت الدوا ما فكرت شنو يصير ؟ لما كنت أدرس في هذي المدرسة أدارة المدرسة وفرت لنا خزانة وعلى فكرة قبل ماتطرح الفكرة على مدارس الكويت وكان هذا اجتهاد من ادارة المدرسة، لما كنا نعاقب على شي كان عقابنا بزيادة الواجبات المنزلية، سؤالي لإدراة المدرسة شنو الضرر في أن الطالب يوقف بالطابور وموحاط جنطته يمه ؟ ولا هذي مجرد قرارات أعت..... ، وبعدين في شغله ثانية انا لاحظتها في جميع المدارس تقريبا وهي لما الطلبه يحضرون متأخرين يتم عقابهم في بعض المدارس بحرمانهم من الحصة الأولى، ليش؟ أغلب الطلبة يوصلونهم اهاليهم المدرسة والتاخير يصير من زحمة الشوارع الصبح والكل يشوف ويدري، وأغلب الأهالي يصلون عيالهم لأكثر من مدرسة يعني وين يلحقون ليش الطالب يعاقب على التأخير ؟ انا سمعت بالباصات اللي توصل الطلبة بس ماشفتها يعني شغلة بالعقل ياجماعة. موقف حصلي العام الماضي لما وصلت ولدي المدرسة وكنا متأخرين لقيت مدرس واقف عند الباب ينطر الطلبة المتأخرين والمدرس كان صغير بالسن يمكن توه متخرج فنزلت مع ولدي علشان اعتذر عن التأخير واشرح له لأن التاخير ما كان ذنب ولدي فقلت له انا آسف استاذ انا اللي تسببت بتأخير ولدي تدرون شنو كان رد المدرس المربي الفاضل ! رد علي وهو يهز الخيزرانة بويهي يقول بس ترا هذي آخر مرة!!!! رديت عليه قلت انا اصغر أخو من اخواني أكبر منك بخمس سنوات ولولا احترامي لوظيفتك كمعلم كان خذيت الخيزرانة اللي بيدك ولسبتك فيها .... شفتوا شلون التربية ( كاد المعلم أن يكون رسولا).



ياريت المسئولين يسمعون الموضوع وياريت من وزيرة التربية ترفع موضوع جنطة الطالب في طابور الصباح هل تكون يمه أو لا ؟ الى مجلس الوزراء ومن مجلس الوزراء الى مجلس الأمة واذا مو ذاكرين الموضوع بالدستور يحول الى المحكمة الدستورية عشان بعد مايطلعون لنا نواب الاستجوابات ويسوون لنا فلم جنطة الطالب ويطالبون بطرح الثقة بوزيرة التربية، بعد موناقصين كافي اللي فينا ونوابنا على طريف.


هذي سالفتي اليوم وبانتظار نقدكم البناء


ملاحظة: على طاري منطقة مشرف منا الى مجلس ادارة جمعية مشرف التعاونية، البراحتين اللي سورتوهم على انه بتسوون حضانة وصالة أفراح انتو مسورينهم حق المجلس اللي عقبكم مثلا، وبعدين بتسوون صالة أفراح بالمساحة الصغيرة هذي خلف فرع 24 ساعة أحد قايلكم الكويتيين يسوون عروسهم حق 20 نفر بس عيب عليكم ترا أهل مشرف ناس واعين ما ينقص عليهم.